Жетісу облысының жалпы орта білім беру ұйымдарындағы Мектеп парламенті – өзін-өзі басқару ұйымының зияткерлік бағыты бойынша 5 590 оқушыны қамтитын «IQ START» интеллектуалдық маусымы өз жұмысын бастады. Интеллектуалдық маусымның негізгі мақсаты – оқушылардың зияткерлік әлеуетін арттыру, сыни және креативті ойлау қабілеттерін дамыту, еркін пікір алмасу мәдениетін қалыптастырумен қатар, жас ұрпақ арасында экологиялық жауапкершілік пен азаматтық белсенділікті нығайту.
2026 жылғы 18 қыркүйекте «IQ START» маусымының ашылуы өткізіліп, зияткерлік бағыттың белсенділері бас қосып, «Таза Қазақстан» және «Адами капитал» тақырыптарын өзара сабақтастықта талқылады. Кездесудің басты идеясы – таза әрі жауапты қоғам қалыптастыру ең алдымен саналы, білімді және белсенді азаматтан басталатынын оқушыларға түсіндіру.
Іс-шара барысында «Таза Қазақстан: табиғатқа жауапкершілік – болашаққа инвестиция» тақырыбы аясында қоршаған ортаны қорғау, табиғи ресурстарды ұқыпты пайдалану, тазалық мәдениетін қалыптастыру және туған өлкені аялаудағы жастардың рөлі сөз болды. Оқушылар «Таза Қазақстан» идеясын тек тазалық акцияларымен шектелмейтін, күнделікті өмір салтына айналуы тиіс ортақ құндылық ретінде қарастырып, экологиялық мәдениетті қалыптастырудағы жеке жауапкершіліктің маңызын атап өтті.
Сонымен қатар, «Адами капитал: білімді ұрпақ – мықты елдің негізі» тақырыбында оқушылардың білімге ұмтылысы, өзін-өзі дамытуы, ерік-жігері, көшбасшылық қасиеттері және қоғам өміріне белсенді араласуы талқыланды. Осы ретте жас ұрпақтың интеллектуалдық дамуы мен экологиялық мәдениетінің қалыптасуы бір-бірімен тығыз байланысты екені айқындалды. Себебі туған жердің табиғатын қорғауға жауапкершілікпен қарайтын, қоғамдық мәселелерге бейжай қарамайтын азамат – елдің адами капиталының маңызды бөлігі.
Интеллектуалдық маусымның ашылуы дебат жетекшісімен өткен ашық пікірталаспен жалғасты. Пікірталас барысында оқушылар өз көзқарастарын ортаға салып, дәлел келтіру, қарсы пікірді тыңдау, мәселені талдау және шешу жолдарын ұсыну дағдыларын жетілдірді. Мұндай формат оқушылардың тек білімін толықтырып қана қоймай, олардың ерік-жігерін шыңдап, өз ойын батыл жеткізуіне және азаматтық ұстанымын қалыптастыруына мүмкіндік береді.
«IQ START» интеллектуалдық маусымы – Жетісу облысындағы Мектеп парламенті – өзін-өзі басқару ұйымының зияткерлік бағытына қатысатын 5 590 оқушыны ортақ идея төңірегіне біріктіретін маңызды алаң. Маусым аясында оқушылардың интеллектуалдық, шығармашылық және көшбасшылық қабілеттерін дамытуға, өзекті қоғамдық және экологиялық мәселелер бойынша пікір алмасуына бағытталған жұмыстар жалғасын табатын болады.
Сажида Зиятай,
Жетісу облысы білім басқармасының дене тәрбиесі, спорт, алғашқы әскери дайындығы және
қосымша білім берудің ғылыми-тәжірибелік орталығының өзін-өзі басқару бөлімінің бөлім жетекшісі
