Лудоманияға, нашақорлыққа, теріс пиғылды діни ағымдарға қарсы иммунитетті қалыптастыру негізгі мәселе. Жастар психологиясындағы стресс, мазасыздық, депрессия, отбасы мүшелерімен қарым-қатынас бұзылуы, өмірге деген қызығушылықтың жойылуы, ұрлық пен алаяқтық, электрондық темекілерге тәуелділіктің алдын алумен күрес тоқтамау керек.
Бұл жөнінде «Әділетті Қазақстанды құру жолындағы жаңа белестер» атты облыстық конференцияда кеңінен айтылды.
Облыстық ардагерлер кеңесінің ұйымдастыруымен өткен келелі жиында ел ағалары ұлт пен ұлыстың аманатын арқалаған жас өскінді тәрбиелеудің жолдарын талқыға салды. Сондай-ақ, Мемлекет басшысының Қазақстан халқына Жолдауында көтерген «Адал адам – Адал еңбек – Адал табыс» қағидатын жүзеге асыру бойынша әңгіме өрбітті. Конференцияға ұйым мүшелері мен білім беру мекемелері, құзырлы орган өкілдері, ғалымдар мен жастар қатысты.
Келелі басқосуда жастарды тәрбиелеу үшін қоғамдағы заңдарды құрметтеу, еңбекқорлық, әлеуметтік әділеттілік, демократиялық құндылықтарды қорғау, адам құқықтарын сақтау сияқты негізгі құндылықтар мен мәдени және әлеуметтік шаралар ұйымдастыру қажет деген ұсыныс айтылды.
– Бабаларымыз ұстанған асыл дінімізді сақтауымыз керек. Дәстүрлі ислам – халқымыздың ұлттық бірегейлігін танытатын басты құндылықтың бірі. Біз оны берік ұстану арқылы экстремизмге және кертартпалыққа қарсы тұра аламыз. Интернетті талғамсыз пайдаланудың бала тәрбиесіне теріс ықпалы көп. Бұл – бүгінгі күннің ақиқаты. Балалар түгілі, ата-аналар да әлеуметтік желідегі мағынасыз жазбаға тым әуестігін байқап жүрміз. Осы орайда, ең алдымен, жастарды кітап оқуға баулу өте маңызды. Президент сөзімен айтатын болсақ, біз осы іргелі құндылықты ұрпақ санасына сіңіре беруіміз керек. Әрбір адам «Адал азамат» деген атқа лайық болса, елімізде әділ қоғам орнайтыны белгілі, – дейді облыстық ардагерлер ұйымының төрағасы Ермек Келемсейіт.
Медет ЖҰМАБАЙ
