Елімізде сирек кездесетін Түркістан сілеусінін спутник арқылы бақылау жұмыстары басталды. Алматы облысынан табылған жыртқышқа «Қараша» деген ат берілді, – деп хабарлайды 7-su.kz ақпараттық порталы.
Бұл тарихи оқиға 20 қарашада Алматы облысының Кеген ауданында, Алғабас ауылы маңындағы Шелек өзенінің жағасында болды. Бақылау кезінде мамандар сілеусіннің шибөрінің өлексесімен қоректеніп жатқанын байқаған.
Осыдан кейін «Көлсай көлдері» ұлттық паркінің қызметкерлері мен Зоология институтының ғалымдары бірлесіп,сирек жыртқышты қауіпсіз түрде ұстады. Мамандар жануардың денсаулығын тексеріп, мойнына арнайы GPS-қарғыбау орнатқан соң, оны қайтадан табиғи ортасына босатып жіберді.
Ғалымдардың айтуынша, қазір «Қарашаның» жағдайы тұрақты. Спутниктік бақылау жүйесі енді Түркістан сілеусінінің қозғалыс бағыттарын, мекен ету аумағын және табиғаттағы белсенділігін тереңірек зерттеуге мүмкіндік береді.






