«Алтынемел» мемлекеттік ұлттық табиғи саябағында арқар фототұзаққа түсіп қалды.
Заманауи құрылғылар жабайы жануарлардың тіршілігін табиғи ортасына кедергі келтірмей бақылауға мүмкіндік беріп отыр. Ұлттық саябақ қызметкерлері әлеуметтік желіде жабайы табиғаттың тыныс-тіршілігінен сыр шертетін ерекше кадрлармен бөлісті. Қазақстанның Қызыл кітабына енген арқар автоматты камераға түсіп қалған. Жартастың үстіне орнатылған фототұзақты байқаған жануар одан үркіп, қашып кетпеген. Керісінше, айналаны иіскелеп, айбарлы мүйізін көрсетіп, біраздан соң көзден ғайып болған.
Арада төрт күн өткенде ұлттық саябақтың басқа аумағында орнатылған тағы бір фототұзаққа екінші арқар түскен. Қазір мамандар екі бейнежазбаны салыстырып, камераға бір жануардың қайта түскенін немесе екі түрлі арқар екенін анықтап жатыр.
Арқар – жабайы қой тұқымдастарының ішіндегі ең ірісі. Ол Қазақстанның Қызыл кітабына сирек кездесетін жануар ретінде енгізілген. Сондай-ақ халықаралық табиғатты қорғау одағының қызыл тізіміне енген.
Айта кетейік, «Алтынемел» ұлттық саябағында Қызыл кітапқа енген сүтқоректілердің 11 түрі мекендейді. Олардың қатарында арқар да бар. Сирек жануарлардың санын сақтау мақсатында саябақ аумағында жыл бойы қорғау жұмыстары жүргізіліп, тұрақты есепке алу шаралары ұйымдастырылады. Инспекторлар мен ғалымдардың соңғы қысқы бақылау деректеріне сәйкес ұлттық саябақ аумағында шамамен 190 арқар бар. Фототұзақтарға жануарлардың тұрақты түсіп отыруы олардың табиғи мекенінде тыныш тіршілік етуіне қолайлы жағдай қалыптасқанын көрсетеді.
А. Байжұмақызы
Кербұлақ ауданы






