Жетісу жері жылдағы дәстүрмен еркін күрес балуандарының бағын сынап Еңбек Ері Зылиха Тамшыбайды еске алуға арналған турнирді биыл 15-ші рет өткізді. Жан-жақтан келген мықтылар өзара үздікті айқындап, кілем үстіндегі бәсекені қыздырды. Күрес әлеміндегі күнтізбеде бұл турнирдің мәртебесі жоғары. Әсіресе жас балуандар үшін – өзін көрсететін басты сын. Жеңіске жеткендер спорттық атаққа ие болып, өзін өзгелер алдында мойындата түседі. Биылғы жарысқа еліміздің әр өңірінен 293 спортшы қатысып, 10 салмақ бойынша жеңімпазды анықтады.
Еліміздегі айтулы балуандардың бәрінің томағасын сыпырып, үлкен аламанға қосқан негізгі жарыстардың бірі осы. Турнир талай мықтының тұсауын кескен дода, әлі талай үздіктің қалыптасуына ықпал ететіні анық.
Зылиха Жанболатқызы саналы ғұмырын еңбекке арнады, қиын-қыстау заманда спортшыларды демеп, олардың жарысқа қатысуына ықпал етті. Бұл жөнінде Зылиха Тамшыбайдың ұлы Қанат Қарабасов: – Қиын кезеңдерде қай сала болсын анамыз барынша көмектесіп, қолдап жататын. Ал дзюдо, самбо, еркін күрестегі жандар өтініш білдіріп келгенде, жарыстан қалдырмай, қолынан келгенше демеп жіберетін. Сол азаматтардың рахметі шығар, бүгінге дейін еске алу турнирі үзілмей, жоғары деңгейде өтіп келеді, – дейді.
Бұл жарыстың жас балуандар үшін маңызы зор. Талай үздіктің аламанда топжарып, күрес әлемінде қалыптасуына септігін тигізді. Сан мықтының алғашқы ірі жарысы есебінде күні бүгінге дейін айтылып, жеке дерегіне жазылды.
– Көптеген мықты балуан күресті. Атап айтсақ, бүгінде ұлттық құрамада жүрген қазақтан шыққан тұңғыш әлем чемпионы Ризабек Айтмұхан, Нұрқожа Қайпанов бар. Жетісулықтардың ішінде Ерасыл Мұхтарұлы, Дәулет Ерімбетов сияқты әлемдік деңгейде күресіп жүргендер бар. Ұзын сонар тізім жасауға болады. Енді Жетісу облысының балуандары үшін бұл жарыс екі есе сын. Өйткені өз жерімізде өтіп жатқаннан кейін үміт пен сенім басым тұрады, – деді өз сөзінде еркін күрестен облыстық ерлер құрамасының аға жаттықтырушысы Рүстем Үтенов.
Бүгінде ел ішінде есімі жиі айтылып, сары құрлықта белгілі болған Ерасыл Мұхтар-ұлы биыл жарысқа қатысты. Негізгі мақсаты – Зылиха Тамшыбай турнирінде барынша әрекеттеніп, желтоқсанда болатын ел чемпионатында басты жүлдені алу.
– Күреспен айналысқаныма 14 жылдан асты. Осы жарысқа жақсы дайындықпен келдік. Негізінен бұл турнир желтоқсан айында болатын Қазақстан чемпионатына дайындық іспетті. Ел біріншілігінің алдында өз-өзімізді тексеріп, әдіс-тәсілдерді шыңдап, жан-жақты даму мақсатында қатысып отырмын, – деді жарыс ортасында тілшілермен кілем сыртында тілдескен Ерасыл Мұхтарұлы.
Өкінішке қарай, 57 келіде күрескен Ерасыл финалда Сәкен Құдайқұлдан (Солтүстік Қазақстан облысы) жеңілді. Кеткен есе желтоқсандағы ел чемпионатында қайтар.
Жеңімпаздар мен жүлдегерлерге арнайы сый-сияпатпен қатар «Спорт шебері» атағы табысталады. Биыл Зылиха Тамшыбайдың туғанына 90 жыл толуына орай тұспа-тұс келген жарыста жеңіске жеткендердің мерейі үстем болғаны анық.
Серік ҚАНТАЙ
