Интернет кеңістігі мен әлеуметтік желілерде шындыққа жанаспайтын жалған ақпараттың таралуы қоғамда абыржу туғызып, азаматтардың сеніміне нұқсан келтіреді, – деп хабарлайды 7-su.kz ақпараттық порталы.
2026 жылдың 1-15 қазан аралығында құзыретті мемлекеттік органдар мен тиісті мекемелер ел ішінде қызу талқыланған бірқатар жалған ақпарат, фейк және манипуляциялық хабарламалар бойынша ресми мәлімдеме жасады. Қоғамдық медиа сауаттылықты арттыру мен заңсыз әрекеттердің алдын алу мақсатында ресми органдар таратқан мәліметтер толықтай сұрыпталды.
Алматы қаласының инфрақұрылымына қатысты «Алматының су құбыры мен кәріз шаруашылығы бөгде компанияның басқаруына беріледі» деген ақпарат шындыққа жанаспайды. «Алматы Су» МКК ресми мәлімдемесінде кәсіпорынның штаттық режимде жұмысын жалғастырып жатқанын, қаланың сумен жабдықтау мен су бұру жүйелерінің операторы болып қала беретінін хабарлады. Нысандарды өзге ұйымдарға беру жоспарланбаған.
Әскери салада да бірқатар манипуляциялар тіркелді. Мессенджерлерде компьютерлік клубтарға келушілерді рейдтер туралы хабарлайтын Telegram-боттарға шақырған хабарламалар тарады. ҚР Қорғаныс министрлігі азаматтарды әскерге шақыру электрондық форматта, SMS-хабарламалар мен eGov жеке кабинеті арқылы заңды жүргізілетінін ескертті. Сондай-ақ әскери оқу-жаттығудан кейін техникалардың орналасу орнына оралмағаны туралы фейк теріске шығарылды. Қорғаныс министрлігі 2026 жылғы 6 қазанда оқу-жаттығу аяқталған соң барлық техника тұрақты орналасу пунктеріне толық қайтарылғанын мәлімдеді.
Денсаулық сақтау саласында Аса қауіпті инфекциялар ұлттық ғылыми орталығында болған өртке қатысты қауесеттер тараған еді. Денсаулық сақтау министрлігі өрттен мамандандырылған зертханалардың зақымданбағанын, жұмыс бөлмелеріне от тимей, герметикалығы толық сақталғанын жеткізді. Ішкі істер министрлігі болса, азаматтарға бір рет берілетін жеке сәйкестендіру нөмірін (ЖСН) қайта өзгерту мүмкін емес екенін ескертті.
Шымкентте өнерпаз Қайрат Нұртастың концертінде бірнеше адам қайтыс болып, 100-ден астам көрермен жараланды деген хабарлама да өтірік болып шықты. Қалалық денсаулық сақтау басқармасы концерт кезінде медициналық көмекке небәрі 8 адам жүгінгенін растады. Тексеруден соң 7 көрермен үйіне жіберіліп, түрлі жарақат алған 18 жастағы бойжеткен ауруханаға жеткізілген. Оның жағдайы дәрігерлердің бақылауында.
Айта кетерлігі, осы кезеңде әлеуметтік желілерде шындыққа сәйкес келмейтін ақпарат таратқаны үшін 5 адам әкімшілік жауапкершілікке тартылды. Тәртіп бұзған тұлғаларға қатысты заңнамалық ықпал ету шаралары қолданылды. Мессенджерлердегі кез келген хабарламаға сенбей, тек ресми дереккөздерге сүйену өңірдегі әлеуметтік тұрақтылық пен жеке қауіпсіздіктің басты кепілі. Жетісу тұрғындары мен барша оқырмандарды медиа сауаттылықты сақтап, тек тексерілген жаңалықтарды бөлісуге шақырамыз.
