Алматыда рұқсатсыз салынған «Жетісу-Семиречье» базарын бұзу жұмыстары ресми түрде басталды. Бұл туралы қала құрылысын бақылау басқармасы мәлімдеді. Түрксіб ауданының Қайрат шағынауданында орналасқан бұл сауда нысанының жалпы аумағы 56 мың шаршы метрден асады. Тексеру барысында аумақты «Статус Construction» ЖШС ешқандай тиісті рұқсат құжаттарынсыз тұрғызғаны анықталған болатын, – деп хабарлайды 7-su.kz ақпараттық порталы.
Заңбұзушылықтар анықталған соң, меншік иесіне қатысты тиісті әкімшілік шаралар қабылданып, кемшіліктерді жою туралы міндетті нұсқама берілді. Алайда берілген уақыт ішінде нұсқама талаптары орындалмағандықтан, қала құрылысын бақылау басқармасы заңсыз нысандарды мәжбүрлеп бұзу туралы Алматы қаласының мамандандырылған ауданаралық экономикалық сотына талап арыз түсірді. Сот талқылаулары нәтижесінде бірінші сатыдағы соттың шешімі өз күшінде қалдырылып, Алматы қалалық сотының қаууысымен өзгеріссіз қалдырылды. Одан кейін іс материалдары сот шешімін мәжбүрлеп орындату үшін Әділет департаментіне жолданған болатын.
Қазіргі таңда сот шешімін орындау мақсатында нысанның меншік иесі бұзу жұмыстарын өз бетінше жүргізіп жатыр. Айта кетейік, Алматы қаласында заңсыз құрылыстармен күрес жұмыстары қарқынды жүргізіліп келеді. Мысалы, бұған дейін қаладағы «Байсат» базары аукционда 24 миллиард теңгеге сатылса, 2 қазанда тағы бір заңсыз салынған дүкен мен шиномонтаж нысандары сүрілген еді. Жалпы статистикаға сүйенсек, жыл басынан бері мегаполисте толық немесе ішінара бұзылған заңсыз нысандардың саны 50-ден асты.
