Бүгін Панфилов ауданының әкімі Марат Рахымбердіұлы Малайзиядан келген ресми делегация өкілдерімен маңызды кездесу өткізді. Кездесуге Жетісу облысының Кәсіпкерлік және индустриялық-инновациялық даму басқармасының басшысы Серік Сәбетайұлы да қатысты, – деп хабарлайды 7-su.kz ақпараттық порталы.
Кездесудің басты тақырыбы – AIDEC компаниясы әзірлеген «Алтынкөл индустриялық цифрлық экологиялық қаласы» (Altynkol industrial digital ecological city) жобасының тұжырымдамасын таныстыру және оны дамыту жолдарын талқылау болды.
Жоба аясында ауданымыздағы Қарақұм құмды-шөлейт аумағында заманауи индустриялық, логистикалық және тұрғын үй инфрақұрылымын қамтитын жаңа қала салу ұсынылды. Бұл ауқымды бастама өңірдің экономикалық әлеуетін еселеп, жаңа жұмыс орындарын ашуға зор серпін береді деп күтілуде.
Қарақұм аумағы өңірдің географиялық ерекшеліктеріне бай. Іле өзенінің оң жағалауына жақын, Қытаймен шекаралас өңірде орналасқан бұл құмды алқаптың жер бедері мен табиғи ортасы өзіндік сипатқа ие. Құмды жоталар, сексеуіл мен жыңғыл тәрізді шөлге бейім өсімдіктер, өзен аңғарларына тән тоғайлы учаскелер осы аумақтың табиғи келбетін қалыптастырады.
