Жетісу облысының орталығы Талдықорған қаласындағы «Жастар» спорт сарайында қызметтік міндетін атқару барысында қаза тапқан, ІІ дәрежелі «Айбын» орденінің иегері Ержан Ахметовті еске алуға арналған самбодан арнайы біріншілік өтті, – деп хабарлайды 7-su.kz ақпараттық порталы.
Бұл тағылымды спорттық шараға өңірдегі күш құрылымдарының ең таңдаулы өкілдері жиналды. Турнир қатысушылар үшін тек спорттық шеберлік пен дене дайындығын көрсететін жарыс қана емес, Отан алдындағы кәсіби борышын өтеу жолында өмірін қиған батыр азаматтың рухына тағзым ету алаңына айналды. Мұндай турнирлер өскелең ұрпақты патриотизмге тәрбиелеп, құқық қорғау органдары қызметкерлерінің арасындағы әріптестік рух пен ауызбіршілікті нығайта түсетін маңызды бастама болып саналады.
Боз кілемдегі әрбір белдесу спортшылардан жоғары төзімділікті, табандылық пен қайсар мінезді талап етті. Түрлі арнайы бөлімшелердің өкілдері жүлделі орындар үшін тартысты жекпе-жектер өткізді. Жарыстың негізгі идеясы – антына адал болып, халық қауіпсіздігі жолында ерлік көрсеткен әріптестің есімін ұлықтау, оның өнегелі өмір жолын кейінгі буынға үлгі ету. Спорттық сайыс барысында әр балуан жоғары дайындығын паш етіп, әділ де тартысты белдесу үлгісін көрсетті.
Тартысты өткен командалық біріншіліктің қорытындысы бойынша І орынды Жетісу облысы полиция департаментінің құрамасы қанжығасына байлады. Екінші орынды 18404 әскери бөлімінің десанттық-шабуылдау бригадасы өкілдері еншіледі. Ал жүлделі үшінші орын Қазақстан Республикасы Ұлттық ұланының 5514 әскери бөлімінің арнайы жасақ балуандарына бұйырды. Жеке есепте үздіктер 58, 64, 71, 79, 88, 98 және 98 келіден жоғары 7 салмақ дәрежесі бойынша анықталып, барлық жеңімпаздар мен жүлдегерлерге арнайы медальдар мен бағалы сыйлықтар табысталды.
Осындай мазмұнды шаралар күш құрылымдары қызметкерлері үшін айрықша маңызға ие. Олар спорттық дәстүрлерді сақтап қана қоймай, жауынгерлік рухты шыңдайды. Ержан Ахметовтің жарқын бейнесі мен батырлық жолы ел тыныштығын күзетіп жүрген әрбір полицей мен әскери қызметші үшін әрдайым шынайы өнеге болып қала береді.
