І. Жансүгіров атындағы Жетісу университетінің «Zhansugurov College» колледжінде студенттер арасында «Тәуелсіздік – ел бақыты, Республика – ел тұғыры» атты эссе байқауы өтті.
Шығармашылық сайыстың мақсаты – жастардың бойында отансүйгіштік қасиетті қалыптастыру, ел тарихы мен мемлекеттілік құндылықтарын дәріптеу, азаматтық ұстанымы мен шығармашылық қабілетін дамыту.
Байқауға 127 Ққ және 208 Ққ топтарының студенттері қатысты. Білімгерлер «Республика күні – елдігіміздің белгісі», «Менің Қазақстаным: өткені, бүгіні және болашағы», «Отанға қызмет ету – азаматтық парыз» және басқа да ұсынылған тақырыптардың бірін таңдап, бір сағат ішінде 500-800 сөз көлемінде эссе жазды. Жұмыстар тақырыптың ашылуы, авторлық көзқарас, ой жүйелілігі, дәлелділігі мен тілдік сауаттылығы бойынша бағаланды.
Байқау жоғары деңгейде ұйымдастырылып, қатысушылардың шығармашылық ізденісі мен азаматтық көзқарасын айқын танытты. Студенттер берілген уақытты тиімді пайдаланып, өз ойларын жүйелі жеткізуге, тақырыпты терең ашуға бар күш-жігерін салды. Әрбір эсседен туған елге деген сүйіспеншілік, тәуелсіздіктің қадірін түсіну және Қазақстанның жарқын болашағына деген сенім байқалды. Қатысушылардың мазмұнды ойлары мен өзіндік пайымдары шығармашылық сайыстың маңызын арттыра түсті.
Нәтижесінде үздік деп танылған эссе авторлары дипломдармен және арнайы сыйлықтармен марапатталды. Осылайша білімгерлер ел болашағына деген көзқарасын қаламмен өрнектеп, азаматтық үнін эссе арқылы жеткізді.
Бақытгүл БАЙЫРБАЕВА,
І. Жансүгіров атындағы Жетісу университеті «Zhansugurov College» тарих пәнінің оқытушысы
Балнұр ҚАНАҒАТОВА,
І. Жансүгіров атындағы Жетісу университеті «Zhansugurov College» бастауыш білім беру оқытушысы
