Президент Қасым-Жомарт Тоқаев Теміртау қаласына жұмыс сапары барысында Qarmet компаниясының сортты прокат кешені құрылысының барысын көрді. Жаңа өндіріс орны жылына 540 мың тоннадан астам дайын өнім шығаруға қауқарлы болады.
Ақорданың мәліметінше, жобаның технологиялық серіктесі – қытайлық CERI инжиниринг компаниясы. Жаңа цехта беріктігі жоғары А600 және А1000 санатты болат арматура, сондай-ақ бұрыштар, швеллерлер және өзге де сұранысқа ие металл өнімдері өндіріледі.
Кешен құрамына сағатына 100 тоннаға дейін металл өңдеуге мүмкіндік беретін жоғары өнімді қыздыру пеші кіреді. Жобаны іске қосу арқылы Qarmet сортты прокат өндірісінің көлемін арттырып, ішкі нарықтың импортқа тәуелділігін төмендетуді көздейді. Сонымен қатар кәсіпорынның құрылыс саласындағы, соның ішінде атом электр стансасын салуға қажетті металл өнімдерін жеткізу мүмкіндігі кеңейеді.
Қазіргі уақытта нысанда негізгі технологиялық жабдықтарды монтаждау және қажетті инфрақұрылымды салу жұмыстары жүргізіліп жатыр. Сортты прокат цехын биыл жылдың соңында пайдалануға беру жоспарланған.
Айта кетейік, Qarmet компаниясының инвестициялық бағдарламасы 3,5 миллиард долларға бағаланады. Металлургия комбинатында төрт ірі жоба жүзеге асырылып жатыр. Олар – №8 және №9 кокс батареяларының, сортты прокат кешенінің, мырыштау және полимерлі жабын желісінің, сондай-ақ құю-илемдеу кешенінің құрылысы.
Компанияның стратегиялық жоспарына сәйкес, 2028 жылға қарай жылына 5 миллион тонна болат, 9 миллион тонна көмір және 5 миллион тонна темір рудасы концентратын өндіру көзделген. Бұдан бөлек, өнімнің өзіндік құнын төмендету, экологиялық көрсеткіштерді жақсарту және отандық металл өнімдерінің бәсекеге қабілеттілігін арттыру міндеттері қойылған.
