Елімізде отандық аквашаруашылықты дамыту, табиғи ресурстарды тиімді пайдалану және су айдындарының балық қорын толықтыру бағытында маңызды жобалар іске асырылуда, – деп хабарлайды 7-su.kz ақпараттық порталы DKNews.kz сайтына сілтеме жасап.
Жетісу облысында жыл сайын 11 млн балық шабағын өсіріп, табиғи су айдындарына жіберу көзделіп отыр. Аталған бастаманы «Жетісу балық» кәсіпорны қолға алып, өндірістік қуатын кеңейтуді бастады. Аталған жоспардың негізгі мақсаты – Балқаш пен Алакөл көлдерінің балық қорын қайта қалпына келтіру және аймақтағы аквашаруашылық әлеуетін арттыру. Өткен жылы кәсіпорын жергілікті су айдындарына 70 мың шабақ жіберсе, алдағы уақытта бұл көрсеткішті 157 есеге ұлғайту көзделуде. Жылдық меже бойынша Балқаш пен Алакөл көлдеріне 10 млн, ал Жетісу облысының ішкі су айдындарына 1 млн балық шабағы жіберіледі. Бұл ретте балықтандыру жұмыстары кәсіпорынның өз қаражаты есебінен жүзеге асырылмақ.
Қазіргі таңда кәсіпорын бахтах, яғни форель өсіруге басымдық беріп отыр. Өндіріс ошағында уылдырықты 25 күн бойы инкубациялап, одан шыққан шабақтарды тағы 25 күн арнайы бассейндерде өсіреді. Шабақтардың салмағы 10 грамға жеткен кезде олар сатуға немесе су айдындарына жіберуге дайындалады. Шаруашылықта тұрақты 7-11 градус температураны сақтайтын жеке ұңғыма суы пайдаланылады. Алдағы уақытта кәсіпорын форельден бөлек тұқы, сазан, ақ амур және дөңмаңдай сияқты балық түрлерін де көбейтуді жоспарлап отыр. Осылайша өңірдегі балықшылар мен кәсіпкерлердің басқа облыстардан қымбат бағаға шабақ тасымалдау шығындары азаяды.
Сонымен қатар «Жетісу балық» кәсіпорны балық жемін шығаратын жеке зауыт салуды көздеп отыр. Мұндай өндіріс импорттық өнімдерге тәуелділікті азайтып, өндірістік шығындарды 20-30 пайызға оңтайландыруға мүмкіндік береді. Мемлекет тарапынан бұл жобаны қолдау мақсатында 75 млн теңге көлемінде жеңілдетілген несие бөлінген. Алынған қаржы уылдырық сатып алуға, құрал-жабдықтарды жаңартуға және инновациялық технологияларды енгізуге бағытталды. Қазақстан Республикасы Ауыл шаруашылығы министрлігінің қолдауымен жүзеге асып жатқан аталған кешенді бағдарлама Жетісу өңірін балық шаруашылығы бойынша еліміздегі жетекші аймаққа айналдыруға зор мүмкіндік береді.
