Еуропалық одақ ұйымға жаңадан қосылатын елдерге қойылатын талаптарды қатаңдатуды мақсат етіп отыр. Жаңа тәртіп бойынша, одаққа мүше болған мемлекеттер 15 жыл бойы Брюссельдің қосымша бақылауында болуы мүмкін.
Бұл туралы Euronews басылымы хабарлады.
Осы уақыт аралығында жаңа мүшелер дауыс беру құқығынан және ЕО-ның ортақ қорынан қаржыландыру алу мүмкіндігінен айырылуы ықтимал. Еуропалық комиссия ұйымның жаңа мүшелеріне ерекше мәртебе беруді көздейтін арнайы тетік әзірлеп жатыр. Ұсынылып отырған өзгерістерге сәйкес, елдер Еуроодаққа кіргеннен кейін он бес жыл бойы қатаң қадағалауда болады. Бұл қадам ұйым ішіндегі тәртіпті күшейтіп, демократиялық құндылықтардың сақталуын қамтамасыз етуге бағытталған.
Аталған кезең ішінде Еурокомиссия олардың ЕО Кеңесіндегі шешім қабылдау үдерісіне қатысуын шектей алады. Сондай-ақ ортақ бюджеттен бөлінетін қаржыны тоқтатуға толық құқылы болады. Мұндай шаралар мемлекет демократиялық қағидаттардан бас тартқан немесе одақтың басқа мүшелерімен адал ынтымақтастық жасау жөніндегі міндеттемелерін бұзған кезде қолданылмақ. Басылымның мәліметінше, жаңа талаптар жақын күндері ресми түрде таныстырылуы мүмкін. Еуроодаққа қосылуға үміткер елдер үшін таңдау шектеулі болады: Брюссель ұсынған шарттарды қабылдау немесе мүшелікке өту үдерісін жалғастырудан бас тарту. Сарапшылардың пікірінше, бұл өзгерістер болашақта одаққа қосылатын мемлекеттердің саяси жауапкершілігін арттырады.
Жаңа талаптармен алғашқылардың бірі болып Черногория бетпе-бет келуі мүмкін. Кейін осындай ережелер Албания, Молдова және Украинамен жасалатын мүшелікке қабылдау жөніндегі келісімдерге де енгізілуі ықтимал. Еуроодақтың бұл бастамасына Венгриямен және Польшаның бұрынғы үкіметімен арадағы ұзақ жылдарға созылған келіспеушіліктер тікелей себеп болған. Қолданыстағы Еуропалық одақ туралы шарттың 7-бабында негізгі қағидаттарды өрескел бұзған мемлекеттен дауыс беру құқығын алып қою мүмкіндігі қарастырылған. Алайда іс жүзінде бұл тетік тиімді жұмыс істемеген еді. Басты кедергі – мұндай шешім қабылдау үшін ЕО-ға мүше қалған мемлекеттердің бірауыздан қолдауы қажет. Бұған дейін Венгрия мен Польша бір-бірін вето құқығын пайдалану арқылы қорғап, Брюссельдің тиісті шараларды жүзеге асыруына кедергі келтірген болатын.
Халықаралық саясаттағы мұндай жаңашылдықтар интеграциялық процестердің күрделене түскенін көрсетеді. Әрбір үміткер ел ұйым талаптарына сай болу үшін ішкі реформаларды тереңдетіп, саяси тұрақтылықты қамтамасыз етуге тиіс. Еуроодақтың қатаң бақылау тетіктерін енгізуі одақтың ішкі тұтастығын сақтауға және болашақта туындауы мүмкін дағдарыстардың алдын алуға көмектеседі.





