Мемлекет басшысы Қазақстан халқына арнаған Жолдауында елдің алдағы даму бағыттарын айқындап, Үкіметке бірқатар нақты міндет жүктеді. Президент экономика өсімін қамтамасыз ету, өндірісті өркендету, инфрақұрылымды жаңғырту, цифрландыру және азаматтардың әл-ауқатын арттыру мәселелеріне тоқталды.
Жолдауда биыл Қазақстан тәуелсіздігінің 35 жылдығы атап өтілетіні айтылды. Осы кезеңде елдің қол жеткізген жетістіктерін сақтап, жаңа даму кезеңіне қадам басу маңызды екені атап өтілді. Мемлекет басшысы қоғамдық тұрақтылық пен бірлікті нығайту, заң үстемдігін қамтамасыз ету ел дамуының негізгі шарттары екенін жеткізді.
Инфрақұрылымдық жобаларға басымдық беріледі
Президенттің айтуынша, инфрақұрылымды жаңғырту экономиканың тұрақты дамуына тікелей әсер етеді. Осы бағытта «Халықтық құрылыс» бастамасы аясында ауқымды жобалар жүзеге асырылмақ. 2029 жылдың соңына дейін Ұлттық қордан бұл мақсаттарға 6,5 триллион теңге бағыттау көзделген. Оның ішінде биыл және 2027 жылдың алғашқы екі айында әлеуметтік жобаларға 1,5 триллион теңге бөлу жоспарланып отыр.
Аталған қаражат есебінен шамамен 70 медициналық нысан, сондай-ақ білім беру, спорт және мәдениет салаларындағы 50-ге жуық нысан салу және жаңғырту жұмыстары жүргізіледі.
Көлік-логистика саласында Бақты–Аягөз теміржол желісінің құрылысы, Арал–Каспий автожолын және Көкшетау–Петропавл бағытындағы жолды дамыту міндеті қойылды. Бақты–Аягөз теміржолы іске қосылғанда жүк тасымалдау мүмкіндігі жылына қосымша 20 миллион тоннаға артады. Сонымен қатар әуежай инфрақұрылымын дамыту және Астанада жаңа әуежай салу мәселесі де назардан тыс қалмады.
Энергетика мен өнеркәсіп саласы дамытылады
Мемлекет басшысы энергетикалық қауіпсіздікті қамтамасыз ету үшін жаңа қуат көздерін іске қосу қажеттігін атап өтті. Қазіргі уақытта елімізде электр энергиясын өндіру көлемі 123 миллиард киловатт-сағатты құрайды. 2029 жылға қарай электр энергиясының профицитіне қол жеткізу міндеті қойылды. Осы ретте Балқаш және Мойынқұм аумақтарында атом электр станцияларын салу мәселесі қозғалды.
Өнеркәсіп саласында өңдеу өндірісін дамыту, пайдалы қазбаларды игеру және сирек кездесетін металдардың әлеуетін тиімді пайдалану маңызды бағыт ретінде белгіленді. Ауыл шаруашылығында да өндіріс көлемін арттыру көзделіп отыр. Атап айтқанда, елде 71 сүт-тауар фермасын іске қосу арқылы сүт өндіру көлемін қосымша 462 мың тоннаға жеткізу жоспарланған.
Шағын бизнес пен инвестиция тарту қолдау табады
Президент шағын және орта бизнестің экономикадағы үлесі 40 пайызға жеткенін атап өтті. Кәсіпкерлікті дамыту, инвестициялық ахуалды жақсарту және жаңа өндіріс орындарын ашу бағытындағы жұмыстар жалғасады. Сонымен бірге бизнеске түсетін әкімшілік жүктемені азайту мәселесі көтерілді. 2027 жылдан бастап үш жылға мораторий енгізу мүмкіндігі де қарастырылмақ.
Цифрландыру және жасанды интеллект – стратегиялық бағыт
Жолдауда цифрлық экономиканы дамытуға және жасанды интеллект технологияларын енгізуге ерекше мән берілді. Қазіргі уақытта Қазақстанда екі суперкомпьютер жұмыс істейді, ал үшіншісін іске қосу жоспарланып отыр. Президент цифрлық шешімдерді мемлекеттік басқару мен экономиканың барлық саласына енгізудің маңызын атап өтті. Сонымен қатар ел аумағында құрылыс жұмыстарын жандандыру, жаңа нысандар мен инфрақұрылым салу мәселесі көтерілді. Бұл бағыттағы жұмыстар экономикалық белсенділікті арттырып, қосымша жұмыс орындарын ашуға мүмкіндік береді.
Әлеуметтік салада бірқатар өзгеріс болады
Мемлекет басшысы азаматтардың табысын арттыру мен әлеуметтік қолдау жүйесін жетілдіруді басты міндеттердің бірі ретінде атады. 2027 жылғы 1 қаңтардан бастап ең төменгі жалақыны 85 мың теңгеден 110 мың теңгеге дейін көтеру жоспарланып отыр. Бұл өзгеріс 1,8 миллион азаматты қамтиды.
Денсаулық сақтау саласында 77 мың медицина қызметкерінің жалақысын 40 пайызға дейін арттыру көзделген. Сонымен қатар сегіз перинаталдық орталық пен жеті балалар ауруханасын салу жоспарланған. Инклюзивті білім беруді дамыту және ерекше білім беру қажеттіліктері бар балаларға қолайлы жағдай жасау да маңызды міндеттердің қатарында.
Заң үстемдігі мен мемлекеттік басқару жүйесі жетілдіріледі
Жолдауда қаржы жүйесін дамыту, салық саясатын жетілдіру және құқықтық реформаларды жалғастыру мәселелері де қамтылды. Мемлекет басшысы банк активтерінің 75 триллион теңгеден асқанын, халық депозиттерінің көлемі 52 триллион теңгеге жеткенін атап өтті. Сонымен бірге Азаматтық кодексті жаңарту қажеттігі айтылды.
Президент мемлекеттік басқару жүйесінің тиімділігін арттыру, заң мен тәртіп қағидатын нығайту және елдің ұзақ мерзімді даму стратегиясын әзірлеу жөнінде тапсырмалар берді. Үкіметке стратегиялық құжатты 2027 жылғы 1 маусымға дейін дайындау міндеті жүктелді.
Жалпы, Жолдауда белгіленген міндеттер экономиканы әртараптандыруға, инфрақұрылымды жаңғыртуға, өндірістік әлеуетті арттыруға және халықтың өмір сүру сапасын жақсартуға бағытталған.
«Жетісу-Ақпарат»
