Өңірдегі өзекті түйткілдерді дер кезінде анықтап, халықпен кері байланысты күшейту бағытындағы жұмыстар жүйелі түрде жүргізіліп келеді. Осы орайда Талдықорған қаласының әкімі Ернат Бәзіл тұрғындарды жеке мәселелері бойынша қабылдап, олардың арыз-шағымдары мен ұсыныстарын мұқият тыңдады, – деп хабарлайды 7-su.kz ақпараттық порталы.
Жүздесу барысында шаһар тұрғындары жол бойындағы қоқыс үйінділері, газ бен ауыз су жүйесімен қамтамасыз ету, жұмысқа орналасу және жер теліміне кезекке тұру тәртібі сынды бірқатар маңызды мәселелерді көтерді. Сонымен қатар қатты тұрмыстық қалдықтарды тасымалдаумен айналысатын жаңа серіктестіктің жұмысын жетілдіру, атап айтқанда жеке тұрғын үй секторларын тазалау ісін ұйымдастыру жөнінде тиянақты ұсыныстар айтылды.
Тұрғындар көтерген әрбір түйткілді мәселеге қатысты шаһар басшысы нақты пікір білдіріп, тиісті сала басшыларына тапсырмалар жүктеді. Қала әкімі Ернат Бәзіл өз сөзінде халықпен ашық диалог орнатып, әрбір тұрғынның мәселесіне бейжай қарамау басты міндет екенін қадап айтты.
«Халықпен ашық диалог орнатып, әрбір тұрғынның мәселесіне бейжай қарамау біздің басты міндетіміз. Көтерілген барлық сұрақтар бақылауда болады және кезең-кезеңімен өз шешімін табады», – деді қала әкімі Ернат Бәзіл жиын барысында.
Қала басшысының бұл ұстанымы тұрғындардың жергілікті билікке деген сенөмін арттырып, түйінді мәселелердің жедел шешілуіне жол ашады.
Мемлекеттік органдардың азаматтармен тікелей жұмыс істеуі және әрбір мәселенің мәніне терең үңілуі өңірдегі әлеуметтік ахуалды жақсартуға оң ықпал етеді. Азаматтардың талап-тілектеріне жедел ден қою арқылы кез келген күрделі мәселені оңтайлы шешуге толық мүмкіндік бар.






