Есте болса, 2022 жылы Түркияның Изник қаласында өткен IV Көшпенділер ойынында Қазақстан құрамасы 3 алтын, 3 күміс, 2 қола медаль алды. Сол жылы көкпардан Қазақстан құрамасы финалдық ойында Қырғызстан құрамасын 4:3 есебімен жеңді. Одан бөлек, қазақ күресінен 60 келіде Марат Нығматуллаев, қыздар арасында 65 келіде Зарина Сарипова чемпион атанды. Жеңісі үшін сол кезде Президент Қасым-Жомарт Тоқаев «Ерен еңбегі» үшін медалімен марапаттаған еді. Сол Зарина биыл да Астанада өтіп жатқан V Көшпенділер ойынында топжарды. Финалдағы кездесуде өзбек қызы Мухлисахон Қадырберғановадан жартылай жеңіс арқылы басым түсті. Жеңімпазбен «Жетісудың» тілшісі тұғырдан түскен бетте азды-кем әңгімелескен еді.
— Ескі жау атыспаққа жақсы. Бұрыннан таныс болған финалдағы жанмен кілем үстінде ұзақ аңдысу, осал тұсты іздеуге арналған уақыт көп болған сияқты.
— Иә, бұрыннан таныс. Осыған дейін Әлем, Азия чемпионаттарында жолымыз түйіскен. Осал қарсылас емес. Бір-бірімізді жақсы білеміз. Бүгінге дейін жалпы жеңіс бойынша бірде бір болып, тең тұр едік, бүгін жеңіп екіге көбейттім.
— Ал биылғы Көшпенділер ойынына дайындықты қалай жүргіздің?
— Жыл басынан бері жоспарлы жаттығулар жүрді. Елімізде ғана емес Грузиямен Қырғызстан мемлекеттерінде де оқу-жаттығу жиыны өтті. Соңғысы Астанада өтті. Жаттықтырушылар айтқан ақылмен, көрсеткен бағыт бойынша жүріп отырдық. Нұсқаулықтан бір елі шыққан жоқпыз. Көшпенділер ойынына қатысып жатқан қазақ күресіндегі балуандардың табысты нәтиже көрсетуі осының айғағы болса керек.
— Осыған дейінде аз жетістікке жеткен жоқсың. Дзюдомен де айналысатыныңды білеміз…
— Иә, әр жыл сайын қазақ күресінен бір жүлде алуды дағдыға айналдырып келемін (күліп). Есіңізде болса 2022 жылы Түркияда өткен Көшпенділер ойынында алтын алдым, одан кейін Әлем чемпионы болдым, ал 2023 жылы Азия чемпионатында күміс, енді міне биыл алтынға қол жеткіздім. Дзюдомен айналысамын. Білсеңіз үш спорт түрінен «спорт шеберімін». Олар самбо, дзюдо, қазақ күресі (Қазақ күресінен Халықаралық дәрежедегі спорт шебері).
— Сұхбатыңызға рақмет!
Серік ҚАНТАЙ
Сурет автордікі
