V Дүниежүзілік көшпенділер ойындарының алғашқы жарыс күнінде спортшылар жамбы атудың мажар стилі бойынша сынға түсті. Жамбы атуға 27 мемлдекеттен 78 спортшы қатысып, олар 11 топқа бөлінді.
Франциялықтар бұл сында екі жүлдеге ие болды. Рафаэль Малет Көшпенділер ойынның алғашқы алтынына ие болса, Алтанкуяг Нергию (Моңғолия) күмісті, ал қоланы тағы бір франциялық Гайтан Блот алды. Қазақстан ұлттық құрамасының мүшесі Абзал Тұлыбековтің нәтижесі үздік бестік болды.
— Мажар стилінің ерекшелігі – спортшы атпен жылдамырақ шауып, нысанаға көп оқу тигізу керек. Жебе санына шектеу жоқ. Қазақстан дирекциясы барлық спортшыны атпен қамтамасыз етті. Тоқсанға жуық атты дайындадық. Көшпенділер ойындарына ұлттық құрама спортшылары үш ай дайындалды. Жыл басынан бері төрт оқу-жаттығу жиынын өткіздік. Әр спортшыға жеке тактика әзірледік,- дейді жамбы атудан Қазақстан ұлттық құрамасының бас бапкері Елдос Бадашев.
Айта кетейік, Қазақстан құрамасының сапындағы Айтбек Сарыбай, Ералхан Айкөз, Батыр Бексауыт, Абзал Тулыбеков осыған дейін Әлем, Еуропа чемпионаттарында жүлделі орындарға ие болған еді. Спортшыларымыз алдағы үш күнде үш стиль (Азия, Түрік, Қазақ) бойынша жүлдеге таласады.
«Жетісу-Ақпарат»
