Кейінгі жылдары елімізде ғана емес, әлемде кең қолдауға ие болып, танымалдығын арттырып келе жатқан спорт түрінің бірі – көз жанарында кемдік, әлсіздік бар жандарға арналған үстел теннисінен «Showdown». «А&А: IT-services & Education» және «Jetysu jastary» ұйытқы болып Талдықорғандағы «Жастар» спорт сарайында ерекше жандар мен мемлекеттік қызметкерлер арасында аталған спорт түрінен жолдастық кездесу өткізді.
Жолдастық кездесуге құрамында үш ойыншыдан жасақталған алты команда қатысты. Үздіктер мен жүлдегерлерге арнайы дипломмен, сый-сияпат табысталды.
– Бұл турнирге қатысудың өзі үлкен мәртебе, ал жеңіске жету – ерекше сезім сыйлады. Күтпеген жеңіс болды. Көзіңді жауып қойып ойнатқанда бойыңды ерекше сезім билейді. Бұл жолдастық кездесудің негізгі мақсаты да осы еді. Адам бойындағы бар бақытын бағалап, айналаны көру сәтін аялай білсе, – деді өз сөзінде «Мансап» орталығының Талдықорғандағы филиалының командасын бастап шығып, жеңіске жеткен директор Азамат Балтабеков.
Дәл осындай жолдастық кездесу айына бір рет ұйымдастырылып тұрмақ. Бұл жөнінде «А&А: IT-services & Education» жастар қоғамдық бірлестігінің басшысы Қуаныш Қапанов айтты.
Серік ҚАНТАЙ
