Жуырда Алматы қаласында киокушинкай-кан каратэден әлем біріншілігі өтті. Феруз Шегебаев пен Әлішер Ахметжан тәрбиелеген және сол байрақты бәсекеде үздіктер қатарынан көрінген спортшыларды облыс әкімінің орынбасары Марлен Көлбаев қабылдап, өңір басшысының алғысын жеткізді.
17-19 қарашада жалауын желбіреткен сайысқа 33 мемлекеттен 700-ге жуық каратэші қатысты. 3 күнге созылған байрақты бәсекеде қазақстандықтар шашасына шаң жұқтырмай жалпыкомандалық есепте 1-орынды еншілеп, қоржынға 115 жүлде салды. Бұл жеңісте жетісулықтардың да өз үлесі бар. Атойлы аламанда облыс абыройын арқалап барған 13 сайыпқыран сапынан Карина Забалич І орынды, Арман Маратов ІІ орынды және Виктория Линникова ІІІ орынды еншіледі.
– Жас спортшыларымыз жарады. Облысымыздың атын шығарып, әлден-ақ мақтанышымызға айналып отыр. Алдағы аламанда да қарымдылығын көрсетіп, жүлделер еншілейді деп сенеміз. Бұл жолғы жеңісін аймақ басшысы да елеусіз қалдырып отырған жоқ. Жетісу өңірі халқы атынан алғаусыз алғысын білдіруде. Жемісті, жеңісті күндеріміз көп болсын, – деді облыс әкімінің орынбасары Марлен Қапашұлы.
Жеңімпаз спортшылардың жаттықтырушысы Феруз Шегебаев бір жылдың ішінде мұндай жетістікке жеткеніне жергілікті атқамінерлердің қамқорлығы екенін айтып отыр. Оның үстіне балалардың да қарым-қабілеті бұл спорттың қыр-сырын меңгеруде өз әсерін тигізіпті.
– Спортшылардың алдында үлкен додалар күтіп тұр. Алдымен келер жылы өтетін Азия біріншілігінде жеңісті қолдан бермеуге тырысамыз. Бастысы, шәкірттеріміз сенім мен үдеден шығады деп білемін. Қазір жаттығуды күшейтіп жатырмыз. Жаттығуда қиын болғанымен шын додада бәсіміз төмендемейді. Жетісудың, Қазақстанның атын шығарар дарабоздарымыз көбейе берсін, – деді Феруз Шегебаев.
Жас әрі жеңімпаз спортшы Арман Маратов та қолдау білдірген аға буынға алғысын айтып, алдағы уақытта жарқын жеңістерге жетіп, жетісулықтардың мерейін өсіретінін жеткізді. Талантты да талапты спортшыларға біз де ризашылық таныттық.
Дастанбек Садық
Cуретті түсірген Жеңіс Ысқабай
