Мемлекет басшысы Қасым-Жомарт Тоқаевқа хат жазған астаналық оқушының арманы орындалды, деп хабарлайды 7-su.kz желілік басылымы.
12 жасар Кемел Жүсіпов ҚР Президентіне хат жазып, оны әлеуметтік желіде жариялаған.
«Құрметті Қасым-Жомарт Кемелұлы! Менің атым Сіздің әкеңіздің есімі сияқты – Кемел. Осыдан тура 12 жыл бұрын 4 желтоқсанда ата-анам маған осы есімді берді. Мен Астанада тұрамын, Қазақстан тарихын, дүниежүзілік тарих пен географияны сүйсіне оқимын, түрлі елдердің банкноты мен монеталарын жинаймын, саяхаттағанды ұнатамын және 4 елде болдым. Бүтін әлемді шарлап шығуды армандаймын… Мен Сізбен кездесуді және қолтаңбаңыз қойылған «Әке туралы ой-толғау» кітабын сыйлыққа алуды армандаймын. Хатыма назар аударасыз және арманым орындалады деп үміттенемін», — делінген оқушының хатында.
Күні кеше Кемел Жүсіпов Instagram-дағы парақшасында Мемлекет басшысы өзінің арманын орындағанын жазды.
«Президент хатымды оқыды. Өзімнің 12 жасқа толған туған күніме Тоқаев Қасым-Жомарт Кемелұлының ізгі тілегі мен қолтаңбасы бар кітапты сыйлыққа алдым. Арманым орындалды, әлі сене алар емеспін», — деді жеткіншек.
Фото: видеодан скрин
