Қазақстан Президенті Қасым-Жомарт Тоқаев пен Иордания Королі ІІ Абдалла бен әл-Хусейн келіссөз жүргізді. Кездесу барысында екіжақты ынтымақтастықты нығайту, саяси диалогты дамыту және экономикалық байланыстарды кеңейту мәселелері талқыланды, – деп хабарлайды 7-su.kz ақпараттық порталы.
Мемлекет басшысы Иордания Королінің Қазақстанға ресми сапары елдер арасындағы берік достықтың, өзара құрмет пен ынтымақтастықтың айқын көрінісі екенін атап өтті.
– Иордания – араб әлеміндегі уақыт тезінен өткен сенімді серіктесіміз. Кейінгі жылдары ықпалдастығымыз қарқын ала бастады. Біз арамызда орнаған түрлі деңгейдегі берік саяси диалогты жоғары бағалаймыз. Былтыр екіжақты қарым-қатынас үшін ерекше кезең болды, бір-бірімізге сапармен бардық. Келіссөздер қорытындысы бойынша бірлескен мәлімдеме қабылданды, сондай-ақ министрліктеріміз бен ведомстволарымыздың және іскерлік орта өкілдерінің арасында көптеген құжатқа қол қойылды. Мұның бәрі көпжақты ынтымақтастығымызды одан әрі ілгерілетуге септігін тигізді, – деді Президент.
Қасым-Жомарт Тоқаев Қазақстанның өзара мүддеге сай барлық салада қол жеткізілген уағдаластықтарды нақты іске асыруға басымдық беретінін жеткізді. Сонымен қатар экономикалық ықпалдастық қазақ-иордан қарым-қатынасының негізгі қозғаушы күші болып қала беретінін атап өтті. Академиялық және ғылыми байланыстарды нығайту, екі ел арасындағы туристер ағынын арттыру арқылы мәдени-гуманитарлық ынтымақтастықты кеңейтуге де мол мүмкіндік бар.
Мемлекет басшысы халықаралық және өңірлік күн тәртібіндегі өзекті мәселелерді шешуде екі елдің ұстанымдары ұқсас екенін айтып, Иордания Королінің достық байланыстарды нығайтуға және халықтарды жақындастыруға қосқан үлесін жоғары бағалады.
– Сіздің көреген басшылығыңызбен Иордания парасаттылық әрі байыптылық үлгісін көрсетіп, халықаралық аренада Таяу Шығыс және одан тысқары аймақтардағы бейбітшілік пен тұрақтылықтың дәйекті жақтаушысы ретінде кеңінен танылды. Осы орайда, Қазақстан Өзіңіз он жылдан аса уақыт бұрын бастаған Ақаба процесін жоғары бағалайды. Мұндай форматтағы кездесуге Орталық Азияда алғаш рет ұйымдастырушылардың бірі ретінде қатысу – біз үшін үлкен мәртебе. Сессия бүгінде аса өзекті саналатын жасанды интеллект саласындағы қауіпсіздік тақырыбына арналып отыр. Саммит Орталық Азия өңірінің ұстанымын білдіріп, бейбітшілік пен қауіпсіздікті сақтау жөніндегі бірлескен күш-жігерімізге тың серпін сыйлайтынына сенімдімін, – деді Мемлекет басшысы.
