Мәліметтерді түзетудің сегіз сервисі eGov.kz электронды үкімет порталында және eGov Mobile мобильді қосымшасында қолжетімді. Сервистер мемлекеттік органдардың ақпараттық жүйесіндегі қате деректерді өзектендіруге және болашақта мемлекеттік қызметтерді кедергісіз алуға мүмкіндік береді, деп хабарлайды Kazinform.
Отбасы (неке, туу, некені бұзу, бала асырап алу, әке болуды анықтау, аты-жөнін өзгерту, қайтыс болу), вакцинация паспортындағы аймақ, көлік құралдарының қате мәліметтері туралы, міндетті мемлекеттік тіркеуге жатпайтын жылжымалы мүліктің кепілі және әскери қызмет туралы мәліметтерді өзектендіріп және дұрыс емес деректер анықталған жағдайда өз мәліметін түзетуге болады.
Заңды тұлғаның және жылжымайтын мүлік объектілерінің атауы мен орналасқан жері туралы мәліметтер де өзектендіруге жатады.
Сондай-ақ, білім туралы мәліметтерді түзетуге, атап айтқанда, ЖОО дипломдары мен ТжКБ, аттестат деректерін өзектендіруге мүмкіндік бар.
«Өздеріңіз білетіндей, азаматтың пәтері немесе автокөлігі туралы деректер мемлекеттік органдардың түрлі деректер базасында орналасқан. Оның ішінде бұл мәліметтер пайдаланушының eGov.kz және eGov Mobile жеке кабинетінде көрсетіледі. Кей жағдайда мәліметтер дұрыс болмауы мүмкін. Ал ол мемлекеттік қызметтерді алу мүмкіндігіне әсер етеді. Енді азаматтардың өмірін жеңілдету үшін біз мемлекеттік органдармен бірлесіп мәліметтерді түзетудің 8 сервисін жасадық. Мысалы, егер сізде отбасы немесе білім туралы құжаттарда дұрыс емес ақпарат болса, құжаттың түпнұсқасының фотосуретін немесе т. б. қажетті мәліметтерді қосып өтініш бере аласыз. Өтінім өңделеді және мәліметтерді тиісті мемлекеттік орган түзетеді», — дейді «Ұлттық ақпараттық технологиялар» АҚ басқарма төрағасы Ростислав Коняшкин.
eGov.kz порталындағы қатені мына сілтемелер арқылы түзете аласыз:
- Вакцинация бойынша мәліметтерді түзету
- Көлік құралдарының қате мәліметтерін түзету
- Заңды тұлғаның атауларын, орналасқан жерін түзету
- Міндетті мемлекеттік тіркеуге жатпайтын жылжымалы мүліктің кепілі туралы мәліметтерді өзектендіру (түзету)
- «Жылжымайтын мүлік тіркелімі» мемлекеттік деректер базасы» ақпараттық жүйесіндегі жылжымайтын мүлік объектілерінің қате мәліметтерін түзету
- Азаматтық хал актісін тіркеу туралы мәліметтерді өзектендіру (түзету)
- Әскери қызмет туралы мәліметтерді өзектендіру (түзету)
- Білім туралы құжаттар туралы мәліметтерді өзектендіру (түзету)
Мәліметтерді түзету үшін міндетті өрістерді толтырып, мәселені сипаттап, қажет болған жағдайда құжаттың көшірмесін тіркеп қызметке қол қою қажет.
Сондай-ақ, «Түзету қызметтері» eGov Mobile мобильді қосымшасындағы басты бетте де тұр.
Қызмет көрсету нәтижесі мәліметтерді өзектендіру туралы хабарлама немесе қызмет көрсетуден бас тарту туралы дәлелді жауап нысанында жеке кабинетке жіберіледі.
Фото: көрнекілікке алынды
