Қазақстан өзінің халықаралық экономикалық және технологиялық байланыстарын қарқынды дамытып, әлемнің жетекші мемлекеттерімен серіктестікті нығайту бағытында маңызды қадамдар жасауда, – деп хабарлайды 7-su.kz ақпараттық порталы.
Иерусалимге барған жұмыс сапары аясында Премьер-министрдің орынбасары, Жасанды интеллект және цифрлық даму министрі Жаслан Мәдиев Израиль Президенті Ицхак Герцогпен кездесіп, Сауда-экономикалық ынтымақтастық жөніндегі Қазақстан-Израиль үкіметаралық комиссиясының 10-отырысында Қазақстан делегациясына жетекшілік етті. Жаслан Мәдиев Ицхак Герцогке Мемлекет басшысы Қасым-Жомарт Тоқаевтың сәлемі мен ізгі тілегін жеткізді. Кездесу барысында екі ел өкілдері бұған дейін қол жеткізілген келісімдердің іске асырылу барысын, сондай-ақ жасанды интеллект, су технологиялары, маңызды минералдар мен туризм салаларындағы ықпалдастықты кеңінен талқылады. Келіссөздер қорытындысы бойынша тараптар тікелей әуе қатынасын дамытуға уағдаласып, визасыз режим енгізу жоспарларын қарастырды.
Отырыс қорытындысындағы ең басты нәтиже – екі ел бизнесі көптен күткен Қосарланған салық салуды болдырмау туралы конвенцияға қол қою. Сонымен қатар арнайы ұйымдастырылған бизнес-форум аясында 7 коммерциялық құжат бекітілді. Жалпы күн тәртібіне инвестициялар, сауда, су ресурстары, денсаулық сақтау, энергетика, өнеркәсіп, жасанды интеллект, киберқауіпсіздік, ғарыш және білім беру мәселелері енгізілді. Келіссөздерге екі мемлекеттің бейінді мемлекеттік органдары мен ұйымдарының жетекшілері қатысты.
Әсіресе су ресурстарын басқару мәселесіне ерекше назар аударылды. Аумағы кең әрі климаттық жағдайлары әртүрлі Қазақстан үшін су жүйелерін мониторингтеу, су шығынын азайту және инфрақұрылымды жаңғырту технологиялары өте өзекті. Осы ретте Израильдің мол тәжірибесін өндіріске енгізу мен бірлескен пилоттық жобаларды іске қосу мүмкіндіктері қарастырылды. Денсаулық сақтау саласында да инвестициялық әріптестік, медициналық инфрақұрылымды дамыту және кәсіби құзыреттер алмасу жайы сөз болды. Келіссөздердің негізгі өзегі саналатын цифрлық экономика бағытында Қазақстан өзінің есептеу инфрақұрылымын жүйелі түрде кеңейтіп, мемлекеттік басқару мен экономика салаларына жасанды интеллектті белсенді түрде енгізіп келеді.
Кездесуде Премьер-министрдің орынбасары Жаслан Мәдиев екіжақты қарым-қатынастың маңызына тоқталып:
«Біз үшін ынтымақтастық тәжірибе алмасу және құжаттарға қол қоюмен ғана шектелмеуі маңызды. Оның нәтижесінде нақты жобалар, жаңа құзыреттер, инвестициялар мен Қазақстанда іске асатын технологиялар пайда болуы керек. Алдағы әріптестікті осы бағытта дамытуды көздеп отырмыз», – деді.
Келесі кезеңде жасанды интеллект, киберқауіпсіздік, ғарыш кеңістігін бейбіт мақсатта зерттеу, ғылым, әлеуметтік сала және инвестицияларды қорғау бағыттарындағы ынтымақтастықты құжат жүзінде толық рәсімдеу жоспарланып отыр.
