Жетісудың 15 кәсіпкері ара шаруашылығы бағыты бойынша тегін оқыту курсын сәтті аяқтағаны туралы сертификат алды.
Олар облыстық кәсіпкерлер палатасы жанынан жұмыс істейтін әйелдер кәсіпкерлігін дамыту орталығы іске асыратын «Мен кәсіпкер» кәсіпкерлік әлеуетін дамыту құралы шеңберінде білім мен дағдыларды меңгеруге мүмкіндік алды. Теориялық және тәжірибелік бөлімдерді қамтитын 3 күндік оқу курсынан өткен кәсіпкерлер арасындағы жаңа бастаған омарташылар алған білімдерін Ескелді ауданының Жетісу кентіндегі «Кәусар» жеке кәсіпкерлігі базасында сыннан өткізді. Осы салада білімі бар белгілі омарташы «Лепсі өнімдері» ЖШС жетекшісі Фархат Абузяров курс өткізіп, өз тәжірибесімен бөлісті. Ол ара шаруашылығы ауылшаруашылығының маңызды саласы және Жетісу өлкесі ара шаруашылығын дамытуға қолайлы аймақ екенін, аралар өсімдіктердің әр түрінен нәр алып, өсімдіктерді тозаңдандыратынын әңгімелеп, жалпы ара шаруашылығындағы жұмыстардың қыр-сырын таныстырды.
– Маған өз тәжірибеммен бөлісуге мүмкіндік берген кәсіпкерлер палатасына алғыс айтамын. Сабақ өткізу кезінде білім алушылардың ара шаруашылығына деген қызығушылығы мен сүйіспеншілігін аңғардым. Маған бұл үлкен ләззат сыйлады, – дейді Фархат Абузяров.
Оқуға қатысушылардың қызығушылығын әйелдер де, ерлер де бірдей байқатты. Олар бал бизнесі туралы білім алып, өнімдерді экспорттау, араларға дұрыс күтім жасау, азықтандыру, аурудың алдын алу туралы біраз мағлұмат алып, білімдерін жетілдірді. Сонымен бірге бал жинау және өңдеу әдістерін зерттеп, үйренді. Мұндай оқыту омарташылардың кәсіби дағдылары мен білімдерін арттыруға ықпал етеді.
– Біздің жеріміз табиғи ресурстарға, жағдайларға бай және ара шаруашылығын дамытуға қолайлы аймақ болғандықтан, болашақта бұл бағыт одан әрі тиімді дамиды деген ойдамын. Оқыту өте қызықты өтіп, үлкен пайдасын тигізді. Сондықтан омарташы ретінде жұмысымды жалғастырамын, – дейді курсқа қатысушы Фарида Айтова.
– «Мен кәсіпкер» құралы аясында тегін қызмет көрсетеміз. Оқыту анықталған қажеттілік негізде кәсіпкерлік әлеуетті арттыру мақсатында өтеді. Біздің міндет – кәсіпкерлерге бизнесті кеңейтуге және құзыреттілікті арттыруға көмектесу. Кәсіпкерлер бұл оқытуға өз ризашылықтарын білдіріп, ара өсірушілер тәжірибе алмасу үшін бір-бірімен тығыз қарым-қатынаста болу маңызды деп санайды, – дейді әйелдер кәсіпкерлігін дамыту орталығының менеджер-кеңесшісі Арай Исағұлова.
Айта кетейік, мұндай оқытуды түрлі бағыт бойынша кәсіпкерлер палатасы тегін жүргізеді.
Айгүл БАЙБОСЫНОВА
