Балалар үйінде тәрбиеленіп шыққан жастарды әлеуметтендіру мақсатында және олардың кәсіпкерлік бастамаларын қолдап, бәсекеге қабілеттілігін дамыту, көшбасшылық қабілеттерін шыңдау үшін бизнес идеялары мен жобаларына арналған «Алға қадам» конкурсы ұйымдастырылды, — деп хабарлайды Жетісу облысы әкімінің баспасөз қызметі.
Облыстық қоғамдық даму басқармасының мәліметінше, байқауға «Айналайын» балалар үйінің түлектері 16 әлеуметтік жоба ұсынған. Комиссия іріктеген 12 жоба үш кезеңнен тұратын конкурстың екінші кезеңге жіберілді. Әр қатысушы конкурстық комиссия мүшелерінің алдында жобаларын қорғады.
Үшінші – қорытынды кезеңде 4 жеңімпаз анықталып, оларға 1 млн. теңгеден шағын гранттар берілді. Атап айтқанда, Денис Лихтиннің «Tuffting кілем тігу», Мария Щелчкованың «Quetilon – кәдесыйлар шығару» жобалары, Жанна Айнағұлованың «Мен өзім» оқу орталығы», Светлана Каменскаяның «Пайдалы тамақтану» жобалары үздік деп танылды. Бұл жобаларды қаржыландыру қатысушылардың өз ісін бастауға, бизнесті жүргізу негіздерін үйренуге, сондай-ақ қоғамдағы әлеуметтік маңызды мәселелерді шешуге өз үлесін қосуға мүмкіндік береді.
Мәселен гранттың көмегімен Светлана Каменская дұрыс теңдестірілген тамақтану курстарын бастауды жоспарласа, Денис Лихтин Tuffting стилінде креативті кілемдер тоқуға кіріспек. Мария Щелчкова заманауи гравюра мен кесу технологияларын қолданып, жарнама агенттігін ашқысы келеді. Жанна Айнағұлова шалғайдағы шағын аудандағы балаларға арналған жылдам оқу орталығын ашпақ ниетте.
Қазіргі уақытта жеңімпаздармен шарт жасалып, жабдықтар сатып алынуда. Бұдан әрі жобалардың іске асырылуына қоғамдық мониторинг жүргізіледі, және жеңімпаздар жобаны іске асыруы туралы қорытынды есеп береді.
Шараны «Жетісу облысының мүгедектігі бар адамдарының облыстық қоғамы» қоғамдық бірлестігі» ҚБ «Азаматтық бастамаларды қолдау орталығы» КЕАҚ-ның және облыстық қоғамдық даму басқармасының қолдауымен ұйымдастырды.
Фото: Жетісу облысы әкімінің баспасөз қызметі
