Қытайдың Ханжчоу қаласында өтіп жатқан ХІХ Азия ойындарында жетісулық велошабандоз Евгений Федоров алтын алды. Ол 210 шақырымға белгіленген топтық жарыста әріптесі Алексей Луценкомен бірге қара үзіп шықты.
Мәреге 80 шақырым қалғанда іркес-тіркес келе жатқан үздіктер тобына алдымен Луценко, одан кейін Федоров шабуыл жасап, суырылып алдыға шыққан. Сол алшақтықты, уақытты сақтап бірге мәреге дейін келді. Екеуі де 210 шақырымды 4:25:29 секундта бағындырды. Осыған дейін жекелей сында биылғы жарыстың алтынын алған, жалпы үш Азия ойындарының жеңімпазы (Инчехон, 2014; Жакарта, 2018; Ханжчоу, 2022) ұлттық құрама капитаны Алексей Луценко мәре сызығынан өтер тұста інісі Егвений Федоровқа ағалық жолын берді. Федоров – алтын, Луценко күміс медаль алды. Жарыс жолына шыққан басқа да қазақстандықтардан Дмитрий Груздев 5-ші, Глеб Брусенский 18-ші болып келді.
– Мен өте қуаныштымын! Дәл осындай маңызды жарыста өзіміздің ойлағанымызды жүзеге асырдық. Ол үшін барша командаластарыма алғыс айтамын. Ал Алексей Луценко бүгін ерекше жұмыс істеді. Бұл барша қазақстандықтардың жеңісі, – деді шағын сұхбатында Евгений Федоров.
Айта кетейік, Евгений Федоров пен Алексей Луценко 23 жасқа дейінгі велошабандоздар арасында әлем чемпионы. Алексей 2012 жылы, ал Евгений былтыр Аустралияда алтын алды. Одан бөлек, 23 жастағы Федоровтың жетістіктер тізімінде 2018 жылы жасөспірімдер арасындағы Олимпиаданың және Азия чемпионатының 4 алтыны бар.
Азия ойындарының ресми аяқталуына 3 күн қалды. Ел қоржынында 8 алтын, 15 күміс, 38 қола медаль бар. Федоровпен қатар бір күнде WKT каратэден Нұрқанат Әжіқанов, джиу-джитсудан Нұржан Батырбеков алтын алды.
Серік Қантай
