Мемлекет басшысы футболдан Қазақстан ұлттық құрамасын Еуро-2024 чемпионатының іріктеу кезеңінде Солтүстік Ирландия командасымен өткен матчтағы тарихи жеңісімен құттықтады.
Бұл туралы 7-su.kz желілік басылымы Ақордаға сілтеме жасап хабарлайды.
«Жеңіс құтты болсын! Бүгін жақсы ойын болды. Шеберлік көрсеттіңіздер. Жұрт, бәрі риза», — деді Қ.Тоқаев.
Бейресми кездесуде футболдан Қазақстан ұлттық құрамасының капитаны Асхат Тағыберген көрсеткен қолдауы үшін Президентке алғыс айтып, команда атынан доп сыйлады.
Сондай-ақ Мемлекет басшысы матчтағы жалғыз гол авторы Максим Самородовқа ризашылығын білдірді.
Айта кетейік, Қазақстан — Солтүстік Ирландия матчы кеше, елордадағы «Астана — Арена» стадионында өтті.
Ойынды тамашалауға Мемлекет басшысы Қ.Тоқаев пен кәсіпқой боксшы Геннадий Головкин де келді.
Эмоцияға толы кездесу қазақстандықтардың пайдасына 1:0 есебімен аяқталды. Ойындағы маңызды голды шабуылшы Максим Самородов салды.
Фото: Aqorda
