Кезнекті Үкімет отырысында Премьер-министр Әлихан Смайылов ауыл шаруашылығындағы дизель тапшылығына қатысты айтты, деп хабарлайды 7-su.kz желілік басылымы.
Үкімет басшысының сөзінше, арзандатылған дизель отыны ауылшаруашылығы өнімін өндірушілерге жеткізілмей отыр.
“Біз арзандатылған дизель отынын толығымен бөліп отырмыз. Бірақ операторлар кейбір өңірлерге өздерінің міндеттемелерін толық орындамай отыр. Кейбір ауыл шаруашылығы өнім өндірушілерге толық көлемде арзандатылған дизельді жеткізбей отыр. Біз бұған қатысты бақылауды күшейтіп жатырмыз және сол операторларды жауапқа тартамыз. Алдағы уақытта ондай операторлармен жұмыс істемейміз”, — деді Әлихан Смайылов Үкімет отырысынан кейін журналистердің сұрағына жауап бере отырып.
Сонымен қатар премьер-министр бағаның энергетикалық қауіпсіздігіне теріс әсер еттінін де тілге тиек етті.
“Бензин мен дизель отынының бағасын одан әрі ұстап тұру елдің энергетикалық қауіпсіздігіне теріс әсер етуі мүмкін. Біз Қазақстан мен көршілес елдер арасындағы баға айырмасын төмендетуге мәжбүрміз. Бізде бұдан басқа жол жоқ. Әйтпесе, бір айдан кейін жанармай тапшылығына тап боламыз”, — деді Үкімет басшысы.
Фото: ғаламтордан
«ЖЕТІСУ» АҚПАРАТ
