«Жеті түрлі білім біл, жеті жұрттың тілін біл» деп үлкендеріміз текке айтпаған. Қай заманда, қай жаста болсын тіл үйрену ешқашан артық етпейді. Сондықтан да тіл меңгеріп, өзге жұрттың мәдениетін, тарихын білу әр адамның көкжиегін кеңейтуге, қалаған арман-мақсатының орындалуына септігін тигізеді. Мәселен, әлем тілдері арасындағы көркемдігі мен бейнелілігі, тазалығы мен сөздік құрамының молдығы жағынан ағылшын тілін ерекше атап өтуге болады. Ал осынау тілді оқушылардың емін-еркін меңгеріп, еркін сөйлеуі үшін біршама жүйелі жұмыс атқару – әрбір ұстаздың міндеті.
Жалпы, мектепте білім алып жатқан оқушылар шет тілді еркін меңгеруі тиіс. Шет тілі оқушылардың тілін дамыту, сөйлеу білік-дағдыларын қалыптастыру, тіл арқылы халықтың рухани байлығын, тарихын танытуды көздейді. Оқушылар сабақта әңгімелесу, бір-біріне сұрақ қою, берілген заттарды сипаттау бойынша анықтау, аударма жасау, сахналық қойылымдарға қатысу арқылы ағылшын тілін үйренеді, меңгереді. Ал осыны көкейіне тоқыған, санасына сақтаған баланың болашағы жарқын, келешегі кемел болады десек қателеспейтініміз анық. Себебі, қазір шет тілін меңгеру – заман талабы. Ал жас ұрпақ ешқашан да уақыт көшінен, заман талабынан шетте қалмауы тиіс.
Әлемдік деңгейдегі игіліктерді жақындататын мақсатқа жету үшін бізге бірінші кезекте халықаралық қатынас тілі болған ағылшын тілін үйренуге жастарымызды жатпай-тұрмай баулуымыз керек. Себебі, болашақ жастардың қолында. Олардың білімді, көкірек көзі ояу, білікті маман болуы үшін біз бүгіннен тынбай еңбек етуге міндеттіміз. Осы тұста ұстазға артылатын жауапкершілік жүгі ауырлайтынын айта кеткеніміз жөн.
Қай заманда, қай кезде болсын, бірнеше тілді меңгерген халық өзінің коммуникациялық және интеграциялық қабілетін кеңейте отырып, ел іргесінің тыныштығы мен бейбітшілігін басты назарда ұстаған. Осы қағидаға сүйене отырып біз мектеп қабырғасында білім алып жатқан әр оқушыға ана тілімізден кейін шет тілін жетік меңгертіп, оның маңызын терең түсіндіруіміз қажет. Болашағымыз деп сенген жастарымыз шет тілін меңгере отырып, ел ертеңінің жарқын болуы жолында аянбай тер төгуі керек.
Үштұғырлы тіл еліміздің бәсекеге қабілеттілікке ұмтылудағы бірінші қадамы десе де болады. Өйткені, бірнеше тілде еркін сөйлей де, жаза да білетін қазақстандықтар өз елінде де, шетелде де бәсекеге қабілетті тұлғаға айналады.
Үш тілді қатар меңгеру – әлемдегі ең дамыған 30 елдің қатарына қосылуды жеделдете түсетіні сөзсіз. Сондықтан да шет тілін меңгерудің маңызы зор. Олай болса, ел болашағы жолында қызмет ететін әр адам шет тілін меңгеріп, оқыған, көңілге тоқыған дүниесін ел болашағы жолына арнаса біз алмайтын асу, бағындырмайтын белес болмасы анық.
Алима ЖЕКСЕМБЕКОВА,
Талдықорған қаласының тұрғыны
Жетісу облысы
