Алматы облыстық өңірлік коммуникациялар қызметінің ұйымдастыруымен «Халықты көмірмен қамтамасыз ету» тақырыбында баспасөз мәслихаты өтті. Онда Алматы облыстық энергетика және тұрғын үй-коммуналдық шаруашылық басқармасы энергетика және энергия үнемдеу бөлімінің бас маманы Ержан Әділет өңірдегі жағдайды баян етті.
— Жылыту маусымына қажетті көмір көлемі 761 мың тоннаны құрайды. Бүгінгі таңда облыс тұрғындарына оның 494 мың тоннасы немесе 65%-ы сатылды. Тұйықтар мен қоймаларда 16,5 мың тонна көмір бар.
Облыста 47 көмір тұйығы мен қоймалары, Райымбек ауданында «Ойқарағай» көмір кен орны бар. Биыл «Қаражырадан» 283,1 мың тонна «Шұбаркөлден» 399,7 мың тонна, «Ойқарағай» кен орнынан 78,2 мың тонна көмір жеткізу жоспарланған. Теміржолмен жеткізу 6 айда 389,4 мың тоннаны құрады. Іс жүзінде 373,4 мың тонна немесе 96%-ы тиелді. Қараша айына 126,9 мың тонна көмір әкеліну керек болса, оның 40,9 мың тоннасы немесе 32%-ы жеткізілді. Тәулігіне 46 вагон немесе 3174 тонна тасымалданады. Оның 17-сі «Қаражырадан», 29-ы «Шұбаркөлден» әкелінеді. Қоймалар мен тұйықтардағы көмірдің орташа бағасы 13 000 мен 17 500 теңге аралығын құрайды. «Ойқарағай» разрезінен бір тонна көмір 8500 теңгеден сатып алынады. Жалпы көмір тасымалдап, халыққа жеткізу бойынша жұмыс өз деңгейінде жүріп жатыр, жоспардан кешігу орын алып отырған жоқ, – деді Е.Әділет.
Брифинг барысында журналистер: «Өткен жылмен салыстырғанда көмірдің бағасы көтерілді ме? Бағаны арзандату бойынша шаралар қарастырылған ба? Газдандыру ісі қарқынды жүргізіліп жатқандықтан қатты отынға деген сұраныс азая түсе ма? Көмір тапшылығы болмай ма?» — деген сауалдарын жолдады.
Өз кезегінде сұрақтарға жауап берген Ержан Бейбітұлы көмір бағасының сәл де болса қымбаттап отырғанын, ол «Қазақстан темір жолы» Ұлттық компаниясының өз тарифін көтеруімен байланысты екенін атап өтті. Жыл сайын көмір бағасын тұрақты ұстауға мейлінше көңіл бөлінетінін айтты. Көгілдір отынды пайдаланушылардың саны артуымен қатты отынға деген сұраныстың да төмендеп келе жатқанын, биыл көмір тапшылығы болмайтынын, оның алдын алу бойынша жоспарлы жұмыс жүріп жатқанын жеткізді.
Алма ЕСЕНБАЙ
Қонаев қаласы,
Алматы облысы
