Әр өскелең азамат туған жерінің бір түп жусанынан бастап, шөкім топырағы, түйір тасына дейін қадірлеп-қастерлей білсе, онда кешегі бабалардың Отан үшін төккен тері мен қанының өтелгені деп білеміз. Мәңгілікке бет алған тәуелсіздігіміздің тұғырлы болуы да осы оймен өзектес.
«Германиядағы Кеңес әскерінің тобы мен Варшава келісімшарты әскерінің тобы ардагерлері» қоғамдық бірлестігі Жетісу облыстық филиалының басшысы Тілек Байқадамов осылай деп жиынды салтанатты түрде ашты. «Рухани жаңғыру» орталығында өткен отырыста ол ұрпақ тәрбиесімен қатар бірлестіктің алдағы уақыттағы атқарар міндеті мен жұмыс жоспарын айшықтап өтті.
– Отан соғысында кеудесін оққа тосқан ардагерлеріміз азайды. Ғибратты әңгімелерін айтып, жастардың бойына елжандылық қасиетті қалыптастыру міндеті енді сіздер мен біздерге артылды. Осы ретте біз қоғамдағы орнымызды айқындап, Германиядағы Кеңес әскерінің құрамында болған және Варшава келісімшартындағы әскер қатарында қызмет еткен кезеңнен тағылымды ой қозғап, тарихта із қалдыруымыз керек. Әрбіріміз облыстағы мектептерге барып, кездесу өткізіп, жастардың намысын жануымыз қажет, – деген Тілек Қайсарұлы шара қонақтарына сөз кезегін ұсынды.
Өз кезегінде сөз алған облыстық қоғамдық даму басқармасының басшысы Болат Керімбек бүгінде жастарымыз әскерге баруды абырой санамайтынын атап өтті. Кешегі күні Отан алдындағы азаматтық борышты өтеу қастерлі борыш саналғанын, ал бүгінгілер; «Уақытты босқа шығындамай, оданда жұмыс істеген абзал», – деп ойлайтынын жеткізді. Мұның алдын алу үшін аталған бірлестіктің 100-ден астам мүшесі белсенді жұмыс істеп, мектеп қабырғасындағы әрбір жас жеткіншекке әскерге барудың адам өміріне тигізер оң әсері бар екенін, оның пайдасы мен ғұмырлық сабағының терең екенін түсіндіру керектігін атап өтті.
Айталық, «Германиядағы Кеңес әскерінің тобы мен Варшава келісімшарты әскерінің тобы ардагерлері» қоғамдық бірлестігі ел көлемінде биыл құрылды. Бүгінде 10-ға тарта облыста аталмыш бірлестік филиалдары ашылып, өз жұмыстарын бастап кетті. Жетісу облысы бойынша ашылған филиалдың мүшелері «Рухани жаңғыру» орталығында осылайша алғашқы отырысын өткерді. Шара соңында филиал директоры Т. Байқадамов бірлестік өкілдеріне мүшелік билет табыстады.
АРДА БИ
Жетісу облысы
