Еліміз жыл сайын үлкен үмітпен күтетін Мемлекет басшысының Жолдауы жаңа оқу жылының басталуымен қатар келуі, ерекше назар аудартты. Кейінгі жылдары жүзеге асырылған реформалар көптің көңілінен шықты. Осы орайда Президент бірқатар проблеманың басын қайырды және жаңа бастамаларды жария етті. Соның ішінде білім саласы жайлы берген тапсырмалары көптің көкейіндегіні тап басты.
«Жайлы мектеп» ұлттық жобасы білім саласында қызмет істейтін біздер үшін өте қуанышты жаңалық болды. Себебі, әр оқушының сапалы білім алуы біз үшін маңызды. Ендігі кезекте осы жобаны бір кісідей іске асыру міндетіміз. Білім саласына қатысты өзгерістердің жемісті болуы сіз бен біздің қолымызда. Ол үшін Президент жүктеген тапсырмаға жұмыла атсалысуымыз керек. Мемлекет басшысы мектепке дейінгі оқу-тәрбие беруді, балабақшалар мен мектепке дейінгі білім беру орындарын көбейтуді, білімді ұрпақтың ел болашағы екенін еске салды. Осыған дейін қабылданған мемлекеттік бағдарламалар мен саяси құжаттардың жалғасы болып табылатын бұл жолғы Жолдауда білім саласына ерекше екпін берілді. Онда айтылған бастамаларды толық қолдай отырып, Жолдау бүкіл халықты ортақ мақсатқа бастама болатынына сенімдімін. Мен Қазақстан халқын Жолдау жүктейтін міндеттерді орындау үшін топтасуға және Жаңа Қазақстанды бірлесе құруға шақырамын.
«Жалпы, мектеп салу Үкімет және әкімдіктер үшін басты міндеттің бірі болуы керек. Жемқорлар сотталғанда, олардың заңсыз тапқан қаржысы мемлекетке өтіп, түгелдей мектеп құрылысына жұмсалуға тиіс. Үкімет осы бастаманы заң тұрғысынан рәсімдеу туралы шешім қабылдауы керек»,–деді Президент. Бұған дейін де елімізде білім ошақтарын салу күн тәртібінен түскен емес. Алдағы жоғары көрсеткішке қол жеткіземіз деп сенемін.
Бала тәрбиесіне ерекше көңіл бөліп, ұлт болып ұйысу қажет. Жеткіншектердің болашағын айқындау мақсатында отбасы мен мектепке дейінгі тәрбиеге немқұрайлы қарамаған дұрыс. Ұлттық тәрбиені негіздей отырып, баланы ұлтжанды етіп тәрбиелеу әрбір ата-ана мен тәрбиешінің басты парызы. Тәрбиелі бала – ұлт болашағы, мемлекеттің тірегі деп түсінуіміз керек.
Жолдауда айтылған: «Мектеп формасын барлық оқушыға барынша қолжетімді ету аса маңызды. Әлеуметтік тұрғыдан әлсіз саналатын кейбір топтағы балаларға оны бюджет есебінен беру қажет деп санаймын. Мектеп формасына арналған мемлекеттік тапсырысты отандық жеңіл өнеркәсіпті дамытуға бейімдеген жөн»,–деген тапсырманы әрбір отбасына жасалған қамқорлық деп түсінемін.
Асхат Исабаев,
Бикен Римова атындағы орта мектеп-гимназиясының директоры
Қаратал ауданы
Жетісу облысы
