Кереге таулы, мөлдір бұлақты, жайқалған құрақты Кеген өңірінде Аршын НҰРБАҚЫТ атты талантты ақын, талмас өнер иесі, білімді де білікті режиссер тұрады.
Аршын Т. Жүргенов атындағы өнер академиясында кинодраматургия мамандығы бойынша Дулат Исабековтің шеберханасынан білім алған. Өте ізденімпаз, оқығаны, тоқығаны көп. Түсінігі кең, танымы терең. Ұлтымыздың шежіресі, тарихы, өнері, әдебиеті, тілі туралы көңіліне түйгені мол. Айтары анық. Жас жүрегінен шыққан шығармашылық дүниесінің бояуы қанық. Тілге шебер, содан да болар, жырларында тосын теңеу, соны тіркестер ұшырасып жатады.
Тар кезеңнің батса-дағы тепкіні,
Құнанбайдың тезге көнбес текті ұлы –
Қазақсыз да Абай өмір сүреді,
Ал Абайсыз бұл қазақтың жоқ күні.
Тұлпар ғұмыр, тарпаң тағдыр тұсауы,
Заман – дауыл қос бүйірден қысады.
Қай кезде де ұлыларға дәуір жат,
Қай кезде де ғұламалар құсалы.
Көзің жасты, көңіл күпті, жан мұздап,
Көп ішінде ғұмыр кештің жалғыз қап, – дейді Аршын «Абайға арнау» атты өлеңінде. Бұл – бір дәуірдің шындығы. Бұл – бүгінгі заманға да тән құбылыс.
Аршын Нұрбақыт Кеген аудандық Мәдениет үйінің режиссері болып 2014 жылдан бері еңбек етіп келеді. Ол араласқан, қолына алған әдеби, мәдени шаралар, шағын сахналық қойылымдар діттеген жерінен шығып, түрленіп, гүлденіп сала береді. Кіршіксіз көңілі, ақ жүрегінен төгілген өлең-жыр, қанатты қағида, маржан сөздер көрермен қауымның жүрегіне жылы қонақтап жатады. «Әп, бәрекелді! Сөйлесең осылай сөйле, қозғасаң осылай қозға, толғасаң осылай толға! Жарайсың, азаматым!», – дегізбей қоймайды. Бұл – түсінігі мол, ойы шалқар, сөзі маржан ақынға айтылған орынды лебіз.
Қанат БІРЖАНСАЛ,
Кеген ауданы
Алматы облысы
