Келешегі кемел болатын мемлекетімізді нығайтатын жастар екені кәміл. Ал, жастар білімді, еңбекқор, мақсат қойғыш болса, онда алынбайтын қамал жоқ. Жер жаннаты Жетісу өңірінде Мағжан атамыз «Мен жастарға сенемiн!» деп сенім артқан дарындылар жетіп-артылады. Солардың бірі – еңбек пен білімді егіз деп санайтын Әнуар РЫСБЕК.
Болашағынан үлкен үміт күттіретін кейіпкеріміз балдырған шағынан айтқан затты қағып алатын зеректігімен, ізденімпаздығымен ерекшеленген. Ата- анасының айтуынша, Әнуар бала күннен түрлі салаларға қызығып, жан-жақты болыпты. Төрт жасынан бастап әріп танып, ертегі кітаптарды оқи бастапты. Сонымен қатар, жүздікке дейінгі сандарды азайтып, қосып, есепті шемішкеше шағыпты. Баланың таудай талабын байқаған ата-анасы Әнуарды оқуға бір жыл ерте жібереді. Қатарынан озып туған талант ерте барса да сабақты өте жақсы оқиды. 1-сыныпта көбейту кестесін жатқа айтады. 6-сыныпқа дейін ауылдық мектепте білім алады.
Дана халқымыз «Өсем деген баланың бетін қақпа, белін бу» дейді емес пе?! Оқуға деген ынтасын, талабын байқаған ата- анасы Әнуарды Талдықорғандағы Назарбаев зияткерлік мектебіне емтихан тапсыруға алып барады. Дарынды талапкер емтиханнан сүрінбей өтіп, мектепке қабылданады. Сол күннен бастап ол білімге деген талпынысымен, еңбекқорлығымен көзге түседі. Небәрі 1-2 жылдың ішінде қазақша, ағылшынша, орысша жазу жазып, кез келген кітапты зуылдатып оқып, тілді меңгеріп алады. Оқуда озат болады,барлық пәнді аса ыждағаттылықпен оқиды.
Әнуар бала күнінде ұшқыш болғысы келіпті. Содан осы сала бойынша сан алуан жарыстарға қатысып, ғылыми жобалардан облыстық, республикалық байқаулардың жеңімпазы атанады. «Дарын» ғылыми жобасында аэродинамикалық қасиеттері жақсартылған экологиялық таза ұшақ ойлап табады. Ол өздері ойлап тапқан «saf» деген жанар-жағармаймен, яғни керосин емес, өсімдіктен алынатын май арқылы ұшады. Білім ордасында жүріп арнайы клуб ашады. Онда ұшқыш болғысы келетін балаларға саланың қиындығы мен қызығын айтып, ел білмейтін қырларымен таныстырады.
Сонымен қатар, ғылыми жоба жарысында су тапшы мемлекеттерге суды фильтрлеудің жобасын жасап, суды сүзу үшін «Aqua» фильтрін ойлап табады. Бұл еңбегі де еш кетпей, жеңімпаз болады. «Гендерлік теңсіздік» тақырыбында ғылыми жоба жасап та бас жүлдені қанжығалайды.
Әнуар сондай-ақ домбыраның құлағында ойнайды. Пән олимпиадаларынан бөлек, ән-күйден өткен жарыстарда талай жеңіске жетеді.
Жаңашылдыққа жаны құмар зияткер мектепті үздік тәмамдайды. Бүгінде Венгрия университетінде оқып жатыр.
Бос уақытында есеп шығарып, түрлі кітап оқып, тіл меңгеруді мақсат еткен жастың арманы асқақ. Болашақта еліміздегі ірі компанияларда жұмыс істеу, шет елде қалып қалмай, оқу барысында жинаған тәжірибесін елімізде пайдалану, елімізге тың жаңалықтар әкелу – арманы. Ұлтқа қызмет етуді көксеген жастың талабына нұр жаусын.
Айдар ҚАЛИЕВ
