Іле ауданы Ащыбұлақ ауылдық округіндегі «Hoffmann aluminium» ЖШС елдегі алюминий профильдерін экструзиялауға маманданған жетекші кәсіпорын саналады. Өнім сапасы әлемдік стандартқа сай. Қазақстанда жасалған отандық өнім алыс-жақын шетелдерге де экспортталады. Аудандағы ірі кәсіпорын жайлы аталған серіктестік бас директорының орынбасары – бас директордың міндетін атқарушы Данияр АСЫЛБЕКҰЛЫ әңгімеледі.
– Данияр Асылбекұлы, компанияларыңыз жайлы айтып берсеңіз?
– Компанияның негізгі қызметі – құрылыс алюминий жүйелерін әзірлеу, өндіру, құрастыру және сату. Инновациялық конструкторлар мен жоғары технологиялық өндіріс, сертификатталған басқару жүйесінің арқасында «Hoffmann aluminium» сауда белгісімен өнім ассортиментін құрайтын заманауи алюминий құрылыс жүйелерін шығып жатыр. Халықаралық сапа стандарттарына сәйкес өнім Қазақстан нарығында ғана емес, сонымен қатар шетелде де бәсекеге түседі. Алюминий зауыты Қазақстан Республикасын индустриялық-инновациялық дамытудың 2015 – 2019 жылдарға арналған мемлекеттік бағдарламасы аясындағы бірінші кәсіпорын ретінде 2013 жылы құрылған.
Қазіргі уақытта бұл зауыт елдегі қалдықсыз технологияларды пайдалана отырып, толық көлемде профиль өндіру технологиясын енгізген жалғыз кәсіпорын. Былтыр алюминий колонка түріндегі жартылай фабрикатты Италия, Грекия елдеріне экспорттауды бастадық. Бұдан өзге профильдерімізді Польша, Украина, Ресей, Қырғызстан, Өзбекстан нарығында сатуды қолға алдық. Қосымша Болгария мемлекетімен келіссөз жүргізудеміз. Алдағы уақытта Германия делегациясымен ортақ мәмілеге келмекпіз. Бұл үшін бізге Павлодардағы зауыттар көмек көрсетуде. Былтыр зауыт жұмысын жаңғыртып, қосымша жабдық алу үшін Сбербанктен несие алдық. Бояу цехын жаңартып, оған қажет жабдықтарға қол жеткіздік. Өндіріске қажет басқа да жабдықтар сатып алынды. Өткен жылғы есеп бойынша өндірілген өнімнің жалпы көлемінің 68,5 пайызын ішкі нарық құраса, қалған 35,1 пайызын экспорт үлесі құрады. Биыл бұл көрсеткішті 50 пайызға дейін жеткізу көзделуде. Яғни, 50 пайыз ішкі нарық, 50 пайыз экспорт.
– Өнімдеріңіздің негізгі тұтынушылары құрылыс компаниялары шығар?
– Біз негізінен әзірлеушілермен немесе аралық монтаждау цехтарымен жұмыс істейміз. Алюминийді профильдер түрінде жасап шығарамыз. Олар біздің өнімдерімізден есік, терезе жасап, қайта өңдейді. Ішкі нарықта өніміміздің тұтынушылары Алматы, Нұр-Сұлтан, Ақтау қалалары, сондай-ақ еліміздің өзге де аймақтарын осы қатарға қосуға болады.
– Пандемия сіздердің компанияға қалай әсер етті?
– Өткен жылғы пандемия ешкімге оңай тимеді. Ол бізге де әсер етті. Соған қарамастан өндіріс орны тоқтаусыз жұмыс істеді. Қысқарту да болған жоқ. Бізде жұмыс істейтіндердің басым бөлігі зауыт маңында тұрады. Карантин талаптарын сақтай отырып, еш кедергісіз жұмыс атқардық. Айта кетейік, өткен жылғы пандемия кезінде біз өндірген өнімдерімізден 5200 тонна алюминийден заттай және ақшалай түрде 9 миллиард теңгеден аса табыс таптық.
– Сіздерде маманды қалай дайындайсыздар?
– Маман тапшылығы бізде өзекті мәселе саналады. Жасыратыны жоқ, қазіргі жастар ауыр жұмыс істегісі келмейді. Көбі экономист, заңгер болғысы келеді. Соның салдарынан Қазақстанда өңдеуші өнеркәсіпте арнайы дайындалған білікті мамандар жоқтың қасы. Бұл біздің компанияға тікелей әсер етеді. Себебі, алюминий өндіру біздің елде аса дамымаған. Бүгінгі таңда Қазақстанда осы саламен айналысатын төрт зауыт бар. Сондықтан жұмысқа білімгерлерді шақырамыз. Олар тез жоғарылап, көп ақша тапқысы келеді. Ал мұндай салада жетістікке жету үшін жарты жыл жеткіліксіз. Жұмысшыларды өзімізде қалдыру үшін әлеуметтік жағдайларын жақсартуға тырысамыз. Оларды жұмысқа әкеліп, үйге апару сияқты жағдайлар жасалады. Сонымен бірге оларға үш уақыт тамақ беріледі. Ұжымның ұйымшылдығын арттырып, денсаулықтарын нығайту үшін футбол турнирлерін ұйымдастырамыз.
– Биылғы жоспар жайлы айтсаңыз?
– Өнімді 6,5 тоннаға, экспортты 50 пайызға дейін арттырып, 12-13 миллиард теңге табыс табуды мақсат етіп отырмыз.
– Әңгімеңізге рахмет
Сұхбатты жүргізген Айдын ТОҚСАНОВ
Іле ауданы
