Ел Президенті Қасым-Жомарт Тоқаевтың Жолдауы Жаңа Қазақстанды құрудағы тың бастамаларға толы болды. Бұл қатарда Сенат, Мәжіліс жұмысын қайта жүйелеп құрудан бастап, бірқатар облыстарда орын алатын өзгерістерді атап өтуге болады. Оның Жетісу жеріне тікелей қатысы бар.
Бұған дейін де бірнеше мәрте екіге бөлініп, қайта қосылған Алматы мен бұрынғы Талдықорған облыстары бөлек-бөлек облыс болып құрылмақ. Бұл саяси тұрғыда дұрыс шешім деп ойлаймын. Өйткені, Алматы маңындағы, тіпті одан да алыс жатқан аудандар үшін облыс орталығы Талдықорғанға келіп-кетіп қатынау қашанда қиындық тудырып келген. Жолдың ұзақтығы, басқа да шығындар бар. Сондықтан да ендігі кезекте Алматы облысының орталығы Қапшағай қаласы болып, ал Талдықорған аумағына Жетісу облысы атауы берілмек. Демек, қайтадан жаңа бір облыс құрылмақ.
Бұл тұста «Талдықорған аймағы бұрынғыдай экономикалық тұрғыда қиындыққа тап болмай ма?» деген де заңды сұрақ туындайды. Алайда қазір еліміздің экономикалық ахуалы сонау 90-шы жылдармен салыстырғанда әлдеқайда көшілгері. Әлеуметтік жағдайымыз тұрақтанды. Әкімшілік орталық Талдықорған қаласы болып қала беретіндіктен жаңа құрылатын Жетісу облысында айтарлықтай қиындықтар туындамайды деген сенім зор.
Алматы облысына келер болсақ, орталығы экономикалық тұрғыда қуатты Қапшағай қаласының болуы көрегенді шешім. Оның үстіне Қапшағай қаласының атауын Қонаев қаласы деп өзгерту ұсынысы түссе, оны да қолдайтынын жеткізді Президент. Бұл ұсынысты Қазақстан халқы бірауыздан қолдайтыны айдан анық. Елі үшін қалтқысыз қызмет еткен Дінмұхамед Ахметұлы Қапшағай су қоймасын салдырып, осы өңірдің дамуына өлшеусіз үлес қосты. Мұнымен қатар қашаннан бергі ел көкейінде жүрген үлкен мәселе – Шығыс Қазақстан облысы екіге бөлініп, жаңа Абай облысы құрылмақ. Облыс орталығы – Семей қаласы болады. Қарағанды облысы да екіге бөлініп, Ұлытау облысы жаңадан құрылады. Облыс орталығы – Жезқазған қаласы атанбақ. Бұл Семей, Жезқазған өңірлерінің қайта түлеп, аяқтан нық тұруына жол ашады.
Міне, осындай еліміз үшін іргелі өзгерістерімен ерекшеленген Жолдау көпшілік көңілінен шықты. Жаңа бастама Алматы мен Жетісу облыстарының экономикалық өрлеуі мен рухани саласына серпін беретіні сөзсіз.
Нағашыбек ҚАПАЛБЕКҰЛЫ,
жазушы, ЮНЕСКО-ның мәдениеттерді жақындастыру орталығының бас ғылыми қызметкері,
Алматы облысының Құрметті азаматы
