Адамзат алапат күйге еніп, білектілер білексізді керексіз қылуға қанша тырысып жатса да мейірім-шуағынан танбайтын жаһандағы жалғыз жоқтаушымыз – әз-Наурыз! Және, міне, есік қақты жайдарлым – Жаңа жылым! Күн түрілді төрінен азаттық алабымның! Қызыр ата шапанының етегімен желпінген Ұлы Даламыз түрлене-бүрлене, құлпырып шыға келді әп-сәтте. Тұла бойы мыңжылдықтар мұғдарындағы түркілік табиғатымыздан тікелей тамыр тартар төл мейрамымыздың әлімсақтан арқа-жарқа, ажарлана тойланып келе жатқанын бүгінде халқымыз жақсы біледі! Парсыға да, исламға да қатысы жоқтығының дәйек-мысалдары соңғы онжылдықтарда көз тұндыра әбден тұжырымдалды да!
Бұл Жылбасының бітімі бөлек, парызы көп. Кешегі Қаңтар оқиғасы таным-түйсігімізді толайым өзгертіп жіберді! Қасиетті қара жермен бірге қара жұртымыз да оянды. Ендігі жерде елдігіміз үзіліп, опық жеп, опырылып қалмас үшін қоғамды, әсіресе, адамдар санасын торлап алған кесепат атаулыдан індете арылу шарт! Бәрінен бұрын елді бұзатын – кесірсөз, кергіген көрпенделер! Асыл рухтан ада-жұда кемсіндер. Демократияны – елірме еліру, еркіндікті – барынан жеріну деп сезініп жүргендер де солар. Отарсыздану – алдымен әркімнің қауашағында түзіледі. Қаңтар оқиғасы қаңтарылса да көбіміздің аңтарылып отырғанымыздың мәні де осы мүкістікте. Сол көшеде бірін-бірі мерт қылғандар мен олардың мүдделестері енді ақпарат майданында соңғы демдері шыққанша күңіреніп бағуда!
Ұятсыз, арсыз, еріншек,
Көрсеқызар жалмауыз.
Сорлы қазақ сол үшін,
Алтыбақан алауыз! – деген хакім Абай әулиенің әулиесі екен!
Ұлт бірікпей – мемлекет кірікпейді. Бүйтпейінше мемлекетшіл ұстанымға ден қою, қандайда да бір өзгеріс өзегін тарту дегеніңіз бекер шаруа. Сол басы тұман, бойы құтан қалпымыздан міз бақпаймыз. Бір-біріне қарсы ішкі кландар мен дүрдараз жұрт ертең ел басына қара бұлт үйіріле қалса, ұран сала біріге ала ма? Украинадағы Зеленский мен Порошенко секілді ұлттың амандығы үшін бір саптан табылар ма? Кличкодай отаншыл, патриот саясаткерлеріміздің қарасы қанша? Тимошенко сынды автомат асынып, ел-жұртын басқыншыларға қарсы бастай алар қыздар шыға ма ортамыздан?!
Мемлекет басшысы Қасым-Жомарт Кемелұлы Тоқаевтың жарқын бастамаларға толы тың Жолдауының Жаңа жылымызбен қатар өріле өмірге келуін жақсылыққа балаймыз! Қоғамды одан әрі демократияландыру бедеріндегі еліміздің саяси жүйесін кешенді жаңғырту бағдарламасы көпшілік күткендегіден де асып түсті! Теңдессіз дүние!
Иә, құлағы түрік билік тік тұрып дегенін жасады, енді өзіміз бүгіліп, бүк шығып жүрмесек деңіз. «Төңкеріс жасауға ұмтылғандардың арасында белгілі адамдар болды. Жоғары лауазым иелері мемлекетке сатқындық жасады. Олар күштік құрылымдардың заңға сәйкес қимылдауына кедергі келтірді. Мемлекет басшылығына қалалардағы ахуал туралы жалған ақпарат берді», – дей келе Президентіміз: «Алайда, береке-бірлігімізді сақтамасақ, жетістіктеріміздің бәрінен айырылып қалуымыз мүмкін. Қаңтардағы дүрбелең кезінде бұған көзіміз анық жетті. Мемлекетіміздің тұтастығына және егемендігімізге зор қауіп төнді. Осы күндерде жұртымыз Тәуелсіздіктің қадір-қасиетін жан-жүрегімен сезінді. Татулық пен тұрақтылық, тыныштық пен бейбітшілік қаншалықты маңызды екенін жете түсінді», – деп ақиқаттың пердесін айқара ашып берді!
Енді «Жаңа Қазақстан» құру үрдісінде қолға алынып жатқан азат рухты тегеурінді шаруалар бұрынғыдан да табандылықпен тың асуларға құлаш сермеуге тиіс. Қордаланған көңді ысырып тастар қаншама иілмес соны заңдар өмірге келмек. Ырғалып, жырғалмастан шапшаң қабылданған шешімдер әдеттегідей таптаурын сүрлеуге түсіп жатса – тағы да құрдымға кеткеніміз! Әлемнің жарық жұлдызына айналған әл-Фараби бабамыз: «Бақытты адам – кемел адам», – десе, қазақ философиясы бойынша тұңғыш диссертация қорғаған Жақыпжан Алтаев: «Кім тез шешім қабылдай алса, сол адам – жетілген адам», – деп сабақтайды. Осы арада кешегі мемлекеттік төңкеріс жасаушыларға тосыннан соққы беріп, батыл да тез шешім қабылдай білген және күні бүгінге сол тәуекелшілдігінен танбай келе жатқан Мемлекетіміздің басшысы Қасым-Жомарт Кемелұлы Тоқаевтың ерен ерлік, адал перзенттігін атап өтпесек азаматтығымызға сын!
Биік билік тарапынан таңдау жасалды! Бұдан былай мемлекет тағдыры, өз тағдырымыз өз қолымызда! Тартынып қалсақ – ұрпақ кешпейді, уақыт және текке кетпейді, жамандық атаулының омырауыңа жабысқаны – сол жабысқан! Қасым-Жомарт Тоқаевтың: «Мен Қазақстан халқының ертең емес, бүгін бақытты болғанын қалаймын!» — деуінің төркіні де осы беткейде! Не істеу керек? Ұлттық рух – бәрінің ақ бастауы. Намыстың алауы да, халықтың жалауы да осы құдіретте! Керек десеңіз, Тәңірдің қалауы да осындай атажонды жерге ұялап қалады!
Президентіміздің Құрылтай құра қаққан алтын қазығына берік байланайық, ұлттық ұстынмен нендей қиыншылыққа да бірге сайланайық! Бес қаруымыз белде, ниетіміз ақдидар елде! Ұлыс Күні оң болғай!
Әміре ӘРІН,
«Жетісу» газетінің бас редакторы,
халықаралық «Алаш» сыйлығының иегері
Алматы облысы
