Бірден айтайық, Президент Жолдауы халықтың көңілінен шықты. Шындықты батыл айтты. Ел ішіндегі кемшіліктерді сараптай отырып, одан шығу жолдарын да тайға таңба басқандай етіп көрсетіп берді.
«Жолдаудың мән-маңызы айрықша. Оның арқалайтын жүгі бір жылмен шектелмейді. Ауқымы кең, мазмұны да бөлек. Біз алдымызға биік мақсаттар қойып отырмыз. Өздеріңізбен бірге Жаңа Қазақстанды құруға кірістік. Халқымыз Тәуелсіздіктің қадір-қасиетін жан жүрегімен сезінді. Татулық пен тұрақтылық, тыныштық пен бейбітшілік қаншалықты маңызды екенін жете түсінді. Біз мызғымас бірліктің арқасында мемлекетімізді қорғап қалдық», – деп Қасым-Жомарт Кемелұлы парасатты халқымыздың төзімділігіне екпін берді.
Тағы бір көпшіліктің көңіліне қонған сөзіне тоқталсам, «Демократия тарихы дегеніміз – ең алдымен, сайлау рәсімдерін жетілдіру тарихы. Осы орайда мен байқаушылардың құқықтары мен жауапкершілігі нақты белгіленуге тиіс деп санаймын. Сондықтан, мен Президенттің өкілеттік кезеңінде партияға мүшелігін тоқтату міндетін заңнамалық түрде рәсімдеуді ұсынамын. Бұл норма саяси бәсекелестікті арттырады, барлық партиялардың дамуы үшін тең жағдайды қамтамасыз етеді», – деді Қасым-Жомарт Тоқаев.
Жолдаудың әр сөзі өзінің тарихи құндылығымен жүрегіміздің төрінен орын алды. Оның жауапкершілігінің өте жоғары екенін де түсінеміз. Әсіресе, Президентіміздің жаңадан Жетісу, Абай және Ұлытау облыстарын ашуы баға жетпес тарихи оқиға деп есептеймін. Мемлекет басшысының өзі айтқандай, Қазақстан халқының даму жолына түскен жаңа қадамына ақ жол тілеймін!
Фарида АБДРАЙМОВА,
Н.Алдабергенов атындағы орта мектептің директоры
Көксу ауданы
Алматы облысы
