Отан-ана, от-ана, жер-ана… Сәлем – сөздің анасы! Осы қасиетті де қастерлі ұғымдардың құдіреті қай кезде құлпырып тұрады екен? Қай кезде емешегі езіліп еміренеді екен? Қай сәтте тіршілік тұтқасына айналып, туыңды желбіретеді екен? Білмеймін!
Оның жөн-жосығын білетіндер болса, айтар, жосығын жасар. Ал Көктем – бар тіршіліктің құлшына қол созып, адамзаттың жүрегіне мейірім тоқитын қыз-дүниенің қыз-қыз қайнаған қызықты сәті сияқты.
«Көкті ем!» – дейді көктің құдіреті!
«Көкті ем де, көгер!» – дейді Көктің ұлдары.
Маған сегізінші наурызға байланысты Еуропадан еріне басып, еркелей келген еркетотай қыз туралы ұғым түк те қызық емес! Керісінше, маған – қыз-көктемнің көгеріп-көктеген көңіл көркі, жаз-Жеңгемнің жайма-шуақ мінезі, күз-Апамның сары майдай сақтаған сыбағасы мен қыс-Әжемнің сықыр-сықыр мұз сыңғырлатқан мұздай тәрбиесі әлдеқайда артық!
Қазақы тәмсілде «қыздың жолы – Қызырдың жолы, қыздың сөзі – Қызырдың сөзі» деген бар. «Қызыр да, қыз да Құдай айдаған жеріне барады. Қызыр да, қыз да Құдай ауызға салған сөзді айтады», – дегені шығар?
Қызыр неге қыз-Көктемде ғана адамзат баласына көрінуге бейіл? Біз неге оны осы мезгілде мейірлене күтеміз?
Сегізінші наурыз! Қыз баласының мерекесі!
…Шексіздік ұғымын білдіріп тұрған осы бір сәт бүкіл әлемді құшағында жылытып, қару-жарақ түгілі, қатыгездіктің өзін жібітіп жіберетіндей көрінеді маған…
Бейбітшіліктің бесігін тербетіп тұрған аналардың білегі талмасын!
Күн нұрындай тіршілік тамырына қуат берген қыздарымыздың тылсым-құдіреті таусылмасын!
«Қыз-қонақ», – дейді атам қазақ. Ендеше, Көктем де – қонақ! Көңіл де – қонақ!
Қонағын Құдайындай күтетін қазаққа Көктем мерекесі – қыз-Көктемнің махаббаты мәңгілік жүрегімізде ән сап тұрса екен деймін.
«Отан-ана, от-ана, жер-ана», «Сәлем – сөздің анасы!» деген қасиетті ұғымдардың баламасына айналған қыз-баласы – аналарымыз – адамзаттың бақытына айнала берсе екен!
Айтпақшы, Наурыз мерекесі құтты болсын!
Бақыт БЕДЕЛХАН,
Қазақстан Жазушылар одағы басқарма төрағасының орынбасары, ақын
