Алматы облысында мемлекеттік органдар ғимараттарын жөндеу, қалпына келтіру жұмыстары жүргізілуде. Талдықорған қаласында 7 мемлекеттік нысан бүлінген. Соның 2-еуі, яғни, аздаған залал келген І.Жансүгіров атындағы Мәдениет сарайы мен М.Тынышбаев атындағы тарихи-өлкетану музейі қалпына келтірілді. Бұл туралы «Жетісу» газеті Алматы облысы әкімінің баспасөз қызметіне сілтеме жасап хабарлады.
Алматы облыстық қаржы басқармасының мәліметіне қарағанда, қалған бес нысан бойынша техникалық сараптама жүргізіліп, дефект актілері мен алдын ала сметалық есептері құрылды. Осы 5 ғимаратта бүгінгі күні қоқыс тазалау мен шығару жұмыстары аяқталып, инженерлік жүйелерге, витраждарға, қасбеттердің қаптамаларына демонтаж жасалды.
Жөндеу жұмыстарына 401 адам мен 12 бірлік техника тартылды. Аталған нысандардың ағымдағы және күрделі жөндеуіне шамамен 4,5 млрд.теңге қажет. Одан бөлек, бүлінгендердің орнына сатып алынатын жиһаздар мен құрал-жабдықтар үшін, нысандардың терроризмнен қорғану талаптарына сәйкестігін қамтамасыз етуге де қаржы жұмсалады.
Шағын және орта бизнес нысандарына қатысты айтсақ, «Атамекен» ҰКП мәліметі бойынша 131 коммерциялық нысанға 8,9 млрд.теңгеге материалдық-мүліктік зиян келтірілген. Алдын ала есептеулер бойынша жалпы келтірілген шығын көлемі — 16,2 млрд.теңге.
«ЖЕТІСУ-АҚПАРАТ»
