Жетісулықтар үшін 2021 жыл несімен есте қалды? «Жетісу медиа» облыстағы ең маңызды оқиғалар тізбесін жариялады. Өтіп бара жатқан жыл Алматы облысының тұрғындары үшін әлеуметтік-экономикалық маңызды оқиғаларға толы болды. Қарқынды құрылыстан бастап қайырымдылыққа дейін түрлі іс-шаралар атқарылды. Сонымен, төменде жетісулықтардың есінде қалған 7 оқиғаны атап өтеміз:
1.Бірінші және есте қаларлық жаңалық — Алматы облысының әкімі Амандық Баталовтың ауысуы болды. Қанат Бозымбаев Алматы облысының әкімі болып тағайындалды. Тиісті Жарлыққа 24 қарашада Президент Қасым-Жомарт Тоқаев қол қойды.
2.Екінші маңызды оқиға — «Алтын Орда» маңындағы көпірдің ашылуы. Ел Президентінің тапсырмасы бойынша Алматы облысында халыққа ыңғайлылықты арттыру және инфрақұрылымды жақсарту мақсатында «Алтын Орда» базарында жаңа магистральдық эстакада бойынша қозғалыс ашылды. Жолдың жүру бөлігінде 8-10 жолаққа дейін кеңейту жүргізілді, бұрылу эстакадасы мен ұзындығы 600 метр негізгі магистральдық эстакада, сондай-ақ, 3 жерүсті жаяу жүргіншілер көпірі салынды.
3.Спорт саласында да ерекше оқиғалар болды. Биыл Алматы облысының екі споршысы Токио-2020 олимпиадасының жүлдегері атанды. Олар — ауыр атлет Игорь Сон мен Зульфия Чиншанло.
4.Рухия Байдүкенова «Славян базары-2021» байқауының бас жүлдесін жеңіп алды. Ол 1998 жылы 27 тамызда дүниеге келген. Талдықорғандық әншінің таланты ерте көрінді, 9 жасынан бастап ол өнер мектебінде вокалмен айналыса бастады. Қазіргі уақытта Рухия Нұр-Сұлтандағы Қазақ ұлттық өнер университетінің «эстрадалық вокал» мамандығы бойынша үшінші курсында оқиды.
5.Қарасай ауданында ірі жылыжай кешені іске қосылды. Елтай ауылдық округінде жалпы ауданы 5,1 гектар заманауи жылыжай кешені пайдалануға берілді. Жылыжайда 5 гектар жерге қызанақ отырғызылды. Мұнда жылына 3 мың тонна қызанақ өндіріледі. Ол жаңа және дәмді қызанақты өсіру үшін автоматты қолайлы климаттық жағдайларды қолданатын жаңа технологиялармен жабдықталған.
6.Алматы облысында британдық екі классикалық туынды қазақ тіліне аударылды. Бұл кітаптар Алматы облысы әкімінің қолдауымен Елбасының «Рухани жаңғыру» бағдарламалық мақаласы бойынша жарық көрді. «Томас, Люси және Алатау» кітабы белгілі сәулетші және саяхатшы Томас Аткинсон туралы баяндайды. Томас әдемі пейзаждарды суреттеді және жергілікті халықтың өмірі мен мәдениетін сипаттайтын егжей-тегжейлі күнделік жүргізді. «Ұлы дала саяхатшылары» атты екінші кітабында Жетісу тарихы мен табиғатына қызығушылық танытқандардың тарихы, зерттеулері мен шытырман оқиғалары сипатталған. Еске сала кетейік, бұдан бұрын Талдықорған қаласында ағылшын тілінде жарық көрген «Томас, Люси және Алатау» кітабының тұсауы кесілген болатын.
7.Талдықорғанда жұртшылық бассейннің ашылуын асыға күтті. Жоба мемлекеттік-жеке меншік әріптестік аясында жүзеге асырылды. Жабық кешеннің жалпы ауданы — 13 мың шаршы метр, өткізу қабілеті күніне 750 адамды құрайды. Кешенде әлемдік стандарттарға сай келетін 3 бассейн бар. Олардың біреуінің ұзындығы 52 метрге жетеді, онда жүзу, аквааэробика, су добы және синхронды жүзу бойынша оқу-жаттығу сабақтары өтеді.
«ЖЕТІСУ-АҚПАРАТ»
