Мемлекет басшысы Қасым-Жомарт Тоқаев әлеуметтік саясатты қысқа мерзімді міндеттерден стратегиялық мақсаттарға бағыттау қажеттігін айтты. Оның пікірінше, мемлекеттік қолдау шын мұқтаж азаматтарға көрсетіліп, бюджет қаражаты тиімді жұмсалуы керек, – деп хабарлайды 7-su.kz ақпараттық порталы.
Президенттің айтуынша, халық санының өсуі мен ішкі көші-қон әлеуметтік инфрақұрылымға түсетін салмақты арттырған. Мектептер мен ауруханаларға сұраныс көбейген тұста мемлекеттік ресурстардың бір бөлігі әлеуметтік төлемдер мен жәрдемақыларға негізсіз жұмсалған.
Қасым-Жомарт Тоқаев бұрын табысы жеткілікті отбасылардың да әлеуметтік көмек алғанын атап өтті. Мұндай тәсіл азаматтардың мемлекетке тәуелділігін күшейтіп, әлеуметтік қамсыздандыру жүйесінде заңсыздықтар мен сыбайлас жемқорлыққа жол ашқан.
Мемлекет басшысы бюджет есебінен негізсіз жеңілдіктер мен төлемдерді көбейтуді популизм деп бағалады. Оның сөзінше, әлеуметтік саясаттың басты мақсаты азаматтарды төлемдерге тәуелді ету емес, халықтың тұрмыс сапасы мен әл-ауқатын арттыру болуы керек.
«Қайталап айтамын: мемлекеттік көмек шын мұқтаж адамдарға ғана берілуге тиіс. Үкіметтің алдында тұрған басты міндеттің бірі – осы», – деді Президент.
Сонымен қатар Мемлекет басшысы әлеуметтік реформаларды жүзеге асыру кезінде азаматтардың жағдайын ескеру қажеттігін айтты. Әрбір бастама жан-жақты сарапталып, әлеуметтік көмек көрсетудің жаңа тетіктері мен ақпараттық жүйелер алдын ала тексерілуі керек. Ол мұндай жобаларды әуелі пилоттық режимде іске қосып, тиімділігі дәлелденгеннен кейін ғана кеңінен қолдануды ұсынды.
Президент әлеуметтік саясатта адам капиталының сапасын арттыруға және өскелең ұрпақтың жан-жақты дамуына қолайлы жағдай жасауға басымдық берілетінін атап өтті.
