Қосқұдық ауылының әлеуметтік мәселелері шешіледі. Бұл туралы облыс әкімі Қанат Бозымбаевтың Қапшағай өңіріне барған жұмыс сапары барысында айтылды. Ауыл тұрғындары аймақ басшысына шешімін күткен бірқатар мәселенің бар екенін жеткізді. Олардың айтуынша, жаңа су құбыры тартылғанымен ауылда ауызсуға қосылу мен үздіксіз су беруде қиындықтар әлі бар. Ауылдағы мектепте асхана жоқ, спортзал жертөледе орналасқан, ал бастауыш сынып оқушылары бейімделген ғимаратта оқып жүр.
Ауылдың фельдшерлік-акушерлік пункті мамандары бұрынғы мешіт ғимаратында отыр. Елді мекен көшелерінде жарық шамдары жоқ. Жайылымдық жер жетіспейді. Балалар мен жастардың бос уақытын пайдалы ұйымдастыруға ықпал ететін Мәдениет үйі керек. Ауыл тұрғындары ұялы байланыс сапасыздығы мен жолдың жөнделмегеніне шағым білдірді. Тұрғындардың барлық өтініш-тілектерін мұқият тыңдаған Қанат Алдабергенұлы сөз болған мәселенің бәрі кезең-кезеңімен шешілетінін айтты.
– Парламентте Жер кодексіне өзгерістер енгізу мәселесі қаралып жатыр. Өзгерістер қабылданғаннан кейін елді мекендерден шеткері орналасқан жерлер мемлекетке қайтарылады. Соның негізінде жайылымдық жерлерді де қайтара бастаймыз. Мектеп пен фельдшерлік-акушерлік пунктте болдым. Екі ғимарат та тозып кеткен. Келесі жылы ФАП-қа арнап жаңа ғимарат тұрғызамыз. Мектепті не демеушілердің қаржысына, не бюджет есебінен саламыз. Бір жылда барлық мәселені шешеміз деп айта алмаймын. Өйткені, сіздердікі секілді ауыл көп. Олардың бәріне көңіл бөлу керек. Бірақ, айтқан проблемалық мәселелеріңізді алдағы жылдардың жоспарына енгіземіз, – деді облыс әкімі.
Бұдан соң аймақ басшысы сорғы стансысына барды. Мұнда ол ауыл тұрғындарын сапалы ауызсумен қамту жұмыстарын жылдамдатуды тапсырды. Қанат Алдабергенұлы еурокірпіш шығаратын жергілікті зауыттың да жұмыс үрдісімен танысты. Кәсіпорынның өндірістік қуаты жылына 30 мың кірпіш шығаруға жетеді. «Art-Construction» ЖШС басшысы Батырбек Байжігітовтің айтуынша, зауыт биыл 9 млн. кірпіш өндірген. Өнімді өткізу мәселесі шешілген, тек жұмысшы қолы жетіспейді.
Шеңгелді массивінің агроөнеркәсіптік әлеуетін дамыту үшін ирригациялық жүйелер мен сорғы стансыларын жөндеу қажет. Бұл бағытта атқарылған жұмыстар мен алдағы жоспарлар туралы Қапшағай қаласының әкімі Нұрлан Құматаев баяндады. Қанат Алдабергенұлы бұл жұмысқа жаңаша көзқарас керек екенін айтты.
– Ирригациялық жүйелерді жаңа прициптерге сүйеніп, кәсіпкерлермен бірлесе отырып, қайта қалпына келтіреміз. Тек ылғал сақтау технологиясын қолданып отырған шаруашылықтарға ғана арналарды бюджет есебінен жөндейтін боламыз. Суды ысырап етпей, жұмыс тиімділігін арттыру үшін шаруалар заманауи агротехнологияны, тамшылатып, жаңбырлатын суару жүйелерін белсенді қолдануға көшуі керек, – деді Қанат Алдабергенұлы.
Облыс әкімі «Dinara Group» құрамына кіретін «Племзавод – Алматы» ірі ауыл шаруашылығы өндірістік кооперативінде болып, Қапшағай өңірінің мал шаруашылығындағы әлеуетін көрді. Мұнда 5 мыңдай Ангус және Герефорд асыл тұқымды ірі қара бар. Соның 3300-і аналық бас. Қазір тәулігіне 70 тонна сүт сауылады. Ұсақ мал басы 15 мыңға, жыл сайын төл алу көрсеткіші 95 пайызға жетіп отыр. Кәсіпорын мал азығын өсірумен де айналысуда. Нысан басшысы Бақыт Атайбеков түйінді мәселелерге де тоқталып, қыркүйек айынан бері субсидия беру кешіктіріліп жатқанын жеткізді. Бұл орайда облыс әкімі ауыл шаруашылығы басқармасы басшысына жедел түрде жағдайды анықтап, жылдам шешуді тапсырды.
Қанат Алдабергенұлы «Oren Space» форматында Шеңгелді ауылдық округі әкімдігі жұмысымен танысты. Қазір мұнда халыққа мемлекеттік қызметтің 6 түрі көрсетіледі.
Алматы облысы әкімінің баспасөз қызметі
