Тәуелсіздіктің 30 жылдығына орай Кеген ауданындағы Жылысай ауылында «Балдырған» бөбекжай бақшасы есігін ашты. Мемлекетіміздің «Ауыл – ел бесігі» бағдарламасы аясында ауылдағы 140 орынды балабақшасының ғимараты күрделі жөндеуден өтті. Заманға лайық 90 балаға арналған жылы да жайлы бөбекжайға айналды. Күрделі құрылыс жұмыстарын «Энерго Строй Проект» ЖШС-нің мамандары мен құрылысшылары жүргізді.
Бөбекжайдың салтанатты ашылуында Кеген ауданының әкімі Талғат Байеділов ауыл тұрғындарын, ата-аналарды қуанышымен құттықтады. «Осынау заманауи балабақшаның іші балапандарға толсын! Құшағынан Тәуелсіз еліміздің тірегі болар, әлемдік бәсекелерде Көк байрағымызды желбіретер, қоғам дамуына айтулы үлесін қосар азаматтар көптеп шықсын!» деген ыстық ниетін жеткізіп, аудан әкімдігінің атынан қажетті құрал-жабдықтарды сыйға тартты. Аудандық аналар кеңесінің төрайымы Бақытгүл Көнеева, ардагер ұстаз, ҚР Білім беру ісінің үздігі Жаңылша Тергеуісова сөз алып, тұрғындар қуанышына ортақ екенін айтты. Ауылдағы ақсақалдар алқасының төрағасы Болат Таубалдиев осынау балабақшаның күрделі жөндеуден өткізілуіне негіз қалаған аудан басшыларына, азаматтарына алғысын білдіріп, ақ батасын берді.
Бастауыш сыныптың ұлағатты ұстазы Гүлнар Батабекова басқаратын бөбекжайда 90 бала мектепалды тәрбие алатын болады. Жылы да жайлы, заманға лайық бөбекжай көп көңілінен шықты. Балапандар қуанышы ұзағынан сүйіндірсін!
Қанат БІРЖАНСАЛ
Кеген ауданы
