Іле ауданының орталығы Өтеген батыр ауылында сервистік әкімдік салтанатпен ашылып, қарапайым халыққа қолайлы әрі жылдам қызмет көрсететін мекеме жұмысқа кірісті.
Аудан әкімі Бағдат Қарасаев, аудандық мәслихат хатшысы Роза Абилова, ауылдық округтің ардагерлер кеңесінің төрағасы Мақсат Сейдалиев қатысқан салтанатты шараға жиналған жұртшылық алдында сөз алған Бағдат Әбілмәжінұлы еліміздің ең ұлық мерекесі – Тәуелсіздігіміздің 30 жылдық мерейтойы қарсаңында бірқатар игі шаралар атқарылғанына тоқталып, «Open spase» форматындағы әкімшілік ашудың артықшылығын түсіндіріп өтті.
Ел Президенті Қасым-Жомарт Тоқаевтың «Халық үніне құлақ асатын мемлекет» тұжырымдамасын орындауға бағытталған мұндай шаралар бүгінгі күні жүйелі жүзеге асырылып келеді. Бүгінге дейін аудандық әкімдіктің Батталханов көшесі жағында, Боралдай ауылында сервистік әкімдіктер жұмыс жасап тұрса, енді Өтеген батыр ауылында тағы бірі ашылып, жуырда Байсерке ауылында да жаңа жүйе іске қосылады.
Былтыр аудандағы сервистік әкімдіктер халыққа 74 мың мемлекеттік қызмет түрін көрсетіп, оның 83 пайызы электронды форматта атқарылған. Сонымен қатар, аудандық басқармалар мен ауылдық әкімдіктер тарапынан 93 «өзіне-өзі қызмет көрсету бұрышы» ашылып, тұрғындарға қызмет көрсетудің сапасы мен санын арттырып келеді. Алдағы уақытта «Open spase» форматындағы әкімдіктер Ащыбұлақ және Күрті ауылдарында өз жұмысын бастайтын болады.
Жаңадан ашылған әкімдік ғимараты күрделі жөндеуден өткізілгеннен кейін жарық әрі адамдардың жүріп-тұруына қолайлы етіп жасалған. Көмек сұрап келген адамдар өздерін мазалаған сұрақтарға бірден жауап ала алады. Бұл тұрғындардың уақытын үнемдеп, жүйкесін жұқартпауға мүмкіндік жасайтын болса керек.
Осы жайлы әңгімелеген Бағдат Әбілмәжінұлы сөзін әзілге бұрып: «Енді мұнда келген жандар «Әкімдерің қайда?» деп сұрамайтын болды. Себебі, шыны әйнектермен ғана бөлінген бөлмелерде бәрі көзге көрініп тұрады», – деді.
Өтеген батыр ауылдық округінің әкімі Қанат Рахимовтың айтуынша, тұрғындар саны күн санап артып, бүгінде 41 мың адамға жеткен. Сондықтан «Open spase» форматындағы әкімдіктің қажеттілігі арта түскен. «Бір терезе» үлгісімен қызмет ететін жүйе бюрократиялық тосқауылдарға жол бермей, шаруаның ашық әрі жылдам атқарылуына мүмкіндік туғызады. Аудан әкімінің екі орынбасарының кезекпен қоғамдық қабылдау өткізуіне мүмкіндік қарастырылған. Бұл жерде тұрғындардың тұрмыстық, әлеуметтік, өзге де жайлары сөзбұйдаға салынбай нақты әрі тез шешімін тауып отырады деп күтілуде.
Қуат ҚАЙРАНБАЕВ
Іле ауданы
Алматы облысы
