Қазіргі таңда психологтардың көмегі үлкенге де, балаға да ауадай қажет. Жақсы психолог – жан дауасы. Аталмыш мамандардың кәсіби шеберлігін арттырып, ізденіспен жұмыс жасауына мүмкіндік жасау – уақыт талабы. Осы орайда Талдықорған қаласындағы №17 орта мектепте облыстық білім беруді дамыту оқу-әдістемелік орталығының ұйытқы болуымен «Үздік психолог» байқауы өтті.
Шығармашылықпен жұмыс істейтін, өз кәсіптік біліктілігін көрсете алатын психологтарды анықтау, қолдау мақсатындағы конкурс 2013 жылдан бері республикалық деңгейде ұйымдастырылып келеді. «Үздік психолог» байқауының облыстық кезеңіне 20 педагог-психолог қатысты.
Шараны облыстық білім беруді дамыту оқу-әдістемелік орталығының директоры Алуа Қабдұлова ашып, психолог мамандығының қоғамға қажеттілігі, әсіресе, девиантты мінез-құлықты, қиын балалармен, тұрмыстық зорлық-зомбылыққа ұшыраған жасөспірімдермен жұмыс істеуде, жастардың өз-өзіне қол салуы сынды қатерлі істің алдын алуда атқарар қызметі зор екенін атап өтті. Байқауға қатысушы психологтарға сәттілік тіледі.
Облысымыздың әр ауданынан қатысқан психологтар үш саты бойынша іріктелді. Бірінші саты бойынша үш жылға дейінгі еңбек өтілі бар, екінші саты негізінде 3-7 жыл аралығында қызмет етіп келе жатқандар, үшінші саты бойынша 7 жылдан астам еңбек өтілі бар психологтар өзара бақ сынады.
Байқауға қатысушылар эссе жазу, өзін-өзі таныстыру, авторлық бағдарламаның тұсаукесері, психологиялық тест тапсырмаларын ұсыну сынды кезеңдерден өтті.
Облыстық білім беруді дамыту оқу-әдістемелік орталығының директоры Алуа Қабдұлова бастаған әділқазылар алқасының шешіміне сәйкес Қаратал ауданы Лермонтов атындағы орта мектебінің педагог-психологі Татьяна Липаева (суретте) І орын иеленді. Қапшағай қаласы, Ы. Алтынсарин атындағы №1 орта мектебінің педагог- психологі Анастасия Компаниец, Талдықорған қаласы, М. Жұмабаев атындағы №19 орта мектеп-гимназиясының педагог-психологі Мейрамгүл Қабылбекова, Алакөл ауданы Қант зауыты орта мектебінің педагог-психологі Анар Қыдырбаева ІІ орын тұғырынан көрінді. Еңбекшіқазақ ауданы, Абылайхан атындағы №4 орта мектебінің педагог-психологі Зарина Омарова, Кеген ауданы, І. Жұмағұлов атындағы орта мектебіне қарасты Көкпияз бастауыш мектебінің педагог-психологі Дидар Бітеев, Қарасай ауданы, Алмалыбақ орта мектеп-гимназиясының педагог-психологі Аймаш Балшекер, Ескелді ауданы, Т. Рүстембеков атындағы орта мектебінің педагог-психологі Күлмира Долдабаева ІІІ орынды еншіледі. Сондай-ақ, Көксу ауданы, Жамбыл орта мектебінің педагог-психологі Базаркүл Каршалова «Кәсіби шебер», Ақсу ауданы, Е. Жайсаңбаев атындағы орта мектебінің педагог-психологі Дана Дүтбаева «Кретивті психолог», Панфилов ауданы, Д. Қонаев атындағы орта мектебінің педагог- психологі Анар Дәулетқанқызы «Үздік авторлық бағдарлама» номинациясын жеңіп алды. Осы жеңімпаздар арасынан алғашқы орындарлы иеленген 6 педагог-психолог республикалық байқауда бақ сынайтын болады.
Алма ЕСЕНБАЙ
