Биыл облыстық кәсіпкерлер палатасы «Жетісу» әлеуметтік-кәсіпкерлік корпорациясымен бірлесіп, «Бастау Бизнес» жобасының түлектерін жеңілдетілген несиемен қамтамасыз ету мақсатында «Atameken Zhetysu» микроқаржы ұйымын құрған болатын. Міне, бүгін аталған қаржы ұйымы тарапынан жалпы сомасы 5 млн. теңге болатын алғашқы жоба қаржыландырылды.
Аймақ бойынша шағын несиелендіруге облыстық бюджеттен 2 млрд. теңге бөлініпті. Бұл қаржымен 500-ге жуық кәсіпкерді қаржыландырып, 1000-нан астам жұмыс орнын құру жоспарлануда.
Биыл «Atameken Zhetysu» микроқаржы ұйымына кәсіпкерлерден 253 өтінім түсіп, бүгінгі таңда 8-і қанағаттандырылған. Қазіргі уақытта 150 өтінім қарастырылу үстінде.
– Микроқаржы ұйымы арқылы несиелендіруге «Бастау Бизнес» оқыту жобасын аяқтаған кез келген қатысушы үміткер бола алады. Әрбір жоба біздің сүйемелдеуімізде. Аудандар мен қалалардағы кәсіпкерлер палатасы филиалындағы кеңесшілеріміз кәсіпкерлерге құжаттарды жинауды бастағаннан жоба бойынша қаражат алғанға дейін жан-жақты қолдау көрсетеді. Кейін берілген қаржының игерілуіне мониторинг жүргізіледі. Ауылдық жерлер үшін қаражат сомасы 7,2 млн. теңгеге, қалада 18,9 млн. теңгеге дейін. Шағын несие 5 жылға дейінгі мерзімге беріледі. Ал мал шаруашылығы саласындағы жобалар үшін 7 жыл мерзімде өтеп бітуге болады. Басты ерекшеліктің бірі – кепілдікпен қамтамасыз етуге шектеу жоқ. Сондай-ақ, несие жеңілдетілген шарттармен жылдық 6 пайыздық мөлшерлемемен беріледі, – деп атап өтті облыстық кәсіпкерлер палатасы директорының орынбасары Дәурен Оналбаев.
Жеңілдетілген несиенің алғашқы иегері талдықорғандық кәсіпкер Әбиден Әбдеш. Ол биыл «Бастау Бизнес» кәсіпкерлік негіздері бойынша оқыту курсын аяқтаған. Берілген қаражатқа кәсіпкер жылқы сатып алып, қымыз өндіруді жоспарлап отыр.
– Мен ұзақ жылдар сауда саласында жұмыс істедім. «Бастау Бизнес» бойынша оқыту жобасы барысында бағытымды өзгертіп, жылқы шаруашылығымен айналысуды шештім. Берілген қаражатқа 13 бас жылқы сатып аламын. Қазір тәулігіне 20 литр қымыз өндірсек, мал басы көбейген соң өнім көлемі де арта түспек. Шаруашылыққа тұрақты жұмысқа төрт адамды алуды жоспарлап отырмын. Жеке ісімді ары қарай кеңейте бермекпін. «Бастау бизнес» бойынша оқыған барша азаматты «Atameken Zhetysu» ұйымы арқылы несие алып, кәсібінің нәсібін табуға шақырамын. Біз сияқты жандарға жол көрсетіп, үнемі жанымыздан табылатын «Атамекен» кәсіпкерлер палатасына алғысымды айтамын, – дейді «Асыл арман» шаруа қожалығының басшысы Әбиден Әбдеш.
Кәсіпкер жігітке 5 млн. теңгенің сертификаты облыстық «Атамекен» кәсіпкерлер палатасында тапсырылды. Осыдан кейін БАҚ өкілдері Әбиден Әбдештің Еркін ауылында орналасқан шаруашылық нысанына барып, оның тіршілігін көріп қайтты.
Егер кәсіпкер ауылдық жерде тұратын болса, онда ол кәсіпкерлер палатасының филиалына барып, сол жерде өтініш қалдыра алады. Сонымен қатар, палата кеңесшілері өтінімді рәсімдеуге, құжаттар тізімін рәсімдеуге және қарыз алушының сауалнамасын микроқаржы ұйымының ақпараттық жүйесінде толтыруға көмектеседі. Ал «Atameken Zhetysu» МҚҰ-ның кеңесіне жүгінгісі келсе, оның кеңсесі Талдықорған қаласындағы Астана даңғылы, 2 А, 2-қабат мекенжайында орналасқанын айта кеткен жөн.
Қажет АНДАС
