Қаланың көркін келтіріп, ажарын аша түсетін сәулетті ғимараттардың бой көтеруі, әрине, жақсы. Жыл соңында Сарқанда 50 пәтерлі бес қабатты тұрғын үй пайдалануға берілетін болады.
Тағы бір жағымды жаңалық – «Нұрлы жер» мемлекеттік бағдарламасы аясында халықтың игілігі үшін салынып жатқан екі қабатты, 20 пәтерлі тұрғын үй. Құрылысты «GoIden City DS» компаниясы қолға алған, нысанның жалпы құны 222 млн. теңге. Биылғы жылға осы қомақты қаражаттың 46 миллионы бөлінген. Бұл үйдің көп уақыт бойы пәтер кезегін сарыла күтіп, үміт құшағында жүрген жандардың берекелі әрі тұрақты шаңырағына айналарына толық сенім бар.
Аудан орталығындағы құрылыстың бүгінгі қарқынын, жай-күйін білу үшін құрылыс нысанына арнайы барып, құрышқолды құрылысшылармен таныстық.
Ауқымды жұмыстардың басы-қасында үнемі жүретін құрылыс бригадирі Руслан Қасымовтың айтуынша, көппәтерлі үйдің құрылысы қалыпты әрі белгіленген кестеге сәйкес жүріп жатыр. Осы жұмысқа икемі бар 12 адам жұмылдырылып, жұмыспен қамтылып отырғаны да көңілге медеу. Руслан Олжаханұлы қазан айының соңына таман жұмысшылар саны 30-40-қа жететінін айтты. Желтоқсан айына дейін суық түскенше нөлдік циклмен жұмыс жүргізу көзделген. Құрылыс учаскесінде жүрген жұмысшылар аудан тұрғындары. Олар күнделікті нәпақасын осы жұмыстан тауып жүр. Ауа райы мұрсат берсе көпқабатты үйдің іргетасын, жертөлесін құйып, шатырын жабу, қабырға кірпіштерін қалау межеленуде.
Аталған тұрғын үйдің құрылыс жұмысы белгіленген кестеге сай келесі жылы аяқталып, баспаналы болсам деп кезекте тұрғандардың үміті ақталмақшы.
Жомарт ИГІМАН
Сарқан ауданы
