Бокс өнерін меңгерудегі шеберлігіміз ел Тәуелсіздігін алғаннан кейін шырқау шыңына жетті. Спорттың әлем елдерін достастырып, танытып, өзара қарым-қатынас, байланыс жасаудағы рөлі зор ғой.
Тәуелсіз Қазақстан құрамасына бапкер болып бекігеннен бастап, ел намысын қорғайтын, Көк Туымызды көкте желбіретер мықты спортшыларды баулуға күш салдық. Желкілдей өскен жас таланттарды іріктеп, оларға бокс дейтін құдіреті күшті спорттың қыр-сырын, техникасын меңгертуді мықтап қолға алдық. Шаршы алаңда айласы мен ақылы үйлескен, білекті де жүректі спортшыларды байрақты бәсекелерге баулыдық. Рингте ел намысы сынға түсетінін жүрегімен сезінетін отаншыл, рухы асқақ спортшылар тәрбиеленді. Олардың көшбасында Қазақстанды төрткүл дүниеге танытқан Сидней Олимпиадасының чемпиондары Ермахан Ыбырайымов, Бекзат Саттарханов, Болат Жұмаділов пен Мұхтархан Ділдәбековтердің есімдері тұрары анық. 90-шы жылдардың соңы мен 2000 жылдары Қазақстан боксының бақ жұлдызы жарқырай жанды. Айталық, Қазақстан боксшылары Хьюстонда (АҚШ) 1999 жылы өткен Әлем чемпионатында 1 алтын, 1 күміс, 1 қола медаль алса, 2000 жылы Сиднейде (Австралия) өткен XXVII Олимпиада ойындарында 2 алтын, 2 күміс медаль иеленіп, айды аспанға шығарғаны тарихымызға алтын әріппен жазылды. Бұл Тәуелсіз ел тарихындағы теңдессіз үлкен жетістік еді!
Бокс – қазақтың қанында бар спорт қой. Соққысы мықты, шаршы алаңдағы көз ілестірмес ширақ қимылымен қарсыласының мысын басып, атойлаған екпініне тойтарыс беру үшін ептілікпен қатар жүректілік те керек. Ал біз, қазақтар, найзаның ұшы, білектің күшімен ұшқан құстың қанаты талатын кең-байтақ жерімізді жаудан қорғаған ержүрек батырлардың ұрпағы емеспіз бе?! Сол ержүректік Тәуелсіздік алған жылдары да айқын аңғарылды. Оған ел мен жердің кемелденуіне, көркеюіне, ең бастысы, Көк байрағымыздың көк жүзінде желбіреуіне үлес қосқан спортшыларымыздың ерен еңбектері куә! Бүгінде еркін елдің көзінде оты, жүрегінде жалыны бар жастары аға буынның еселі еңбектері мен ел қоржынына салған толағай табыстарының алтын арқауын үзбеуге күш салуда. Сол жолда тер төгіп, еңбек етуде. Тәуелсіздігіміздің тұғырлы болуына, өркениетті елдермен терезесі тең болуына айрықша атсалысуда.
Тәуелсіздік алған отыз жыл ішінде қазақстандық спортшыларымыздың жұлдыздары жарқырай жанып, әлемдік ареналардағы алар орны айқындалды. Бокстан бұрын-соңды болмаған халықаралық дүбірлі жарыстар өтсе, жер жаннаты Жетісуымыздың төрінде ақ Азиада ойындары, қысқы Универсиаданың ұйымдастырылуы да осы егемен еліміздің мәртебесін арттырып қана қоймай, жер шарында Қазақстан деген тәуелсіз мемлекет барын көрсетті. Егемен еліміздің спорттағы мерейінің өсуіне айрықша үлес қосты.
Тұрсынғали Еділов,
Қазақстанның еңбек
сіңірген қайраткері,
«Құрмет» орденінің
иегер
