Облыста өңірлік кәсіпкерлер палатасы жанындағы оқу орталықтарының тізіміне енген 79 оқу орталығы нарықта сұранысқа ие 200-ден аса мамандық бойынша жұмыссыздарды қысқамерзімді оқытуды жүзеге асыруда. Осы жылы облыс бойынша 1500-ден аса адам жаңа мамандықтарды меңгереді. Қысқамерзімді кәсіптік оқытумен айналысатын оқу орталықтарының бірі Текелі қаласында орналасқан. Өткен жылдың қорытындысы бойынша оқу орталығы облыста білімгерлерді жұмысқа орналастыру көрсеткіші бойынша көшбасшы атанды.
Қысқа мерзімді оқудан өткен жұмыссыздардың 95,5 пайызы тұрақты жұмысқа орналасқан және жеке кәсібін ашқан. Жақында оқу орталығында «аспаз» мамандығы бойынша қорытынды емтихандар өтті. Оқу орталығының жетекшісі Светлана Оңғарбаеваның айтуынша, қазіргі таңда оқу орталығын 18 тігінші мен 20 аспаз бітірді. Оқу ұзақтығы үш ай, студенттер ай сайын 20 мың теңге көлемінде шәкіртақы алады.
– Біздің оқу орталығы «Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған» мемлекеттік бағдарламасын іске асырудың арқасында және «Атамекен» кәсіпкерлер палатасы мен Текелі қаласының жұмыспен қамту орталығының қолдауымен ашылып, үш жыл жұмыс істеп келеді. 2019-2020 жылдары оқу орталығында 115 адам білім алды, оның ішінде 60 тігінші, 35 кассир және 20 аспаз бар. 110 адам немесе қатысушылардың 95,5 пайызы жұмысқа орналастырылды. Оның ішінде 26 түлек өз ісін ашуға грант алды. Биыл біз 18 тігінші мен 20 аспазды оқыттық, – дейді Светлана Оңғарбаева.
Қазіргі ағымның түлектерінің бірі – Назгүл Төлендиева. Оқу орталығында ол аспаз ісі бойынша үш айлық курстан өтіп, қаладағы мейрамхана кешендерінің бірінде жалақысы жоғары жұмыс тапты. Емтихан кезінде комиссия мүшелері аспаздың курстық біліктілік жұмысына жоғары баға берді.
Леонид Пак – «тігінші» мамандығы бойынша оқу орталығын тамамдаған студенттердің бірі. 2019 жылы оқу орталығында біліктілігін көтеріп, кәсіпкерлер палатасының қалалық филиалы жанынан «Бизнес Кеңесші» жобасы бойынша оқудан өтті. Жобаны қорғап, «Бизнестің жол картасы – 2025» мемлекеттік бағдарламасы аясында 2 млн. теңге көлемінде мемлекеттік грант алды. Бүгінгі таңда кәсіпкер таза былғары мен теріден түрлі бұйым жасайды. Шағын цех үш адамды жұмыспен қамтамасыз етіп отыр.
Светлана Оңғарбаева оқу орталығында мамандық бойынша біліктілікке ие болып қана қоймай, кәсіпкерлік негіздеріне оқытылып, қайырымдылық шараларына белсенді қатысады. Мәселен, өткен жылы пандемия кезінде оқу орталығы 1000-нан аса бетперде тігіп, көпбалалы отбасылар мен мүгедектігі бар адамдарға таратты. Жыл сайын студенттер Бөбектер үйінің тәрбиеленушілері үшін киім-кешек тігеді. Сонымен қатар, орталық түлектері кәсіпкерлер үшін ашық сабақтар ұйымдастырады.
– Оқу орталығында ашық сабақтар мен шеберлік сыныптарын жиі өткіземіз. Ол сабақтарды біздің түлектеріміз жүргізеді. Өз ісін ашқан түлектер біздің қатысушыларды іс тәжірибесіне алып, әрі қарай жұмысқа орналастыруға жәрдемдеседі. Биыл студенттердің шамамен 30 пайызы оқу орталығын аяқтаған түлектеріміздің нысандарына жұмысқа орналасты. Сондықтан біз барлық студенттермен үнемі байланыстамыз, еңбекпен қамтуға, бизнестің бағытын анықтауға, жобаларын сүйемелдеуге қолдау көрсетеміз, – дейді оқу орталығының басшысы.
«Текелі қаласы әкімдігінің халықты жұмыспен қамту орталығы» КММ басшысы Жасұлан Қапалов қалада үш оқу орталығы бар екенін атап өтті. Ағымдағы жылы қысқа мерзімді оқытумен 80 адам қамтылады.
Жалпы, Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» бағдарламасы шеңберінде бағдарламаның бірінші бағытына сәйкес жұмыс беруші өзінің кәсіпорнында оқу орталығын құра отырып, ҰКП жанындағы оқу орталықтарының тізіліміне енгізілген жағдайда шығындарды өтей отырып, жұмысшы кадрларды дербес дайындауға мүмкіндігі бар.
«Атамекен» кәсіпкерлерге оқу орталығын құру бойынша қажетті қолдау көрсетіп, оқу орталықтарының тізілімін жүргізуде. Бүгінгі күні кәсіпкерлер палатасы жанындағы оқу орталықтарының тізілімінде 79 оқу орталығы бар, оның ішінде кәсіпорындар жанынан 37, колледждер жанынан 35, дербес оқу орталықтары жанынан 6 және жоғары оқу орны жанынан бір орталық құрылған. Оқыту сұранысқа ие 200-ден аса мамандық бойынша жүргізіледі. Биыл 1500-ден астам адам оқумен қамтылады деп жоспарлануда. Ережеге сәйкес оқу орталықтары білім алушылардың 60 пайыздан кем емес мөлшерін жұмысқа орналастыруы тиіс, – деді облыстық кәсіпкерлер палатасының бұрынғы басшысы болған Әсет Шаяхметов.
Қысқамерзімді оқуға жұмыссыз азаматтар қатыса алады. Ол үшін жергілікті жұмыспен қамту орталығына жүгініп, жазылулары керек. Кәсіпкерлік субъектілері мен жұмыс істеп тұрған оқу орындары қысқамерзімді кәсіптік оқыту бағдарламалары бойынша оқу орталығын ашу үшін өңірлік кәсіпкерлер палатасына жүгінуі қажет.
Айгүл БАЙБОСЫНОВА
